Сөрөг хүчний зүтгэлтэн Борис Немцов нас барсны 10 жилийн ойн өдөр буюу Пүрэв гаригт /2025.02.27/ түүний дурсгалыг хүндэтгэхээр олон хүн Большой Москворецкийн гүүрэн цугларсан байв. Гэвч дан ганц Москва гэлтгүй улс даяар Немцовд хүндэтгэл үзүүлсэн хүмүүс баривчлагдсан гэж орон нутгийн хэвлэл мэдээллээр мэдээлжээ. Тодруулбал, 2015 оны хоёрдугаар сарын 27-нд Немцовыг Москва хотын Большой Москворецкийн гүүрэн дээр буудан хөнөөсөн бөгөөд уг гүүрний ойролцоо байх түүний түр дурсгалын хөшөөг цагдаа нар бүсэлсэн байжээ. Цагдаагийн бүрэлдэхүүн хүндэтгэл үзүүлсэн хэнийг ч баривчилж, хажуугаар нь зөрөх иргэдийн бичиг баримтыг шалгаж байсан гэж орон нутгийн хэвлэлд онцолсон юм.

Түүнчлэн, Европын холбоо, Франц, Итали, Германы элчин сайд нарын үлдээсэн цэцэг, хөрөг, цэцгэн хэлхээ зэргийг хаяж байгаа харагдсан байна.

"RusNews" агентлагийн нэгэн дүрс бичлэгт цагдаагийн албан хаагч утсаар "Бүгдийг цуглуулж, холдуулж, хөөж гарга" гэж тушааж буй нь харагдсан нь олон нийтийн шүүмжлэлийг нэмэгдүүлсэн юм. Мөн тус агентлагийн мэдээлснээр, өдөр 12:00 цагийн үед гүүрэн дээр нэгэн эрэгтэйг саатуулж, нийгмийн хэв журам зөрчсөн хэргээр баривчилсан байна. Гүүрэн дээр Немцовд хүндэтгэл үзүүлэхээр цугларсан олны талаар сурвалжлах гэсэн хоёр сэтгүүлч мөн адил саатуулагджээ. Сибирийн Барнаул хотод мөн адил Немцовд хүндэтгэл үзүүлэхээр цугларсан хүмүүсээс ярилцлага авах гэж байхдаа нэгэн сэтгүүлч баривчлагджээ. Уфа хотод улс төрийн хэлмэгдэгсдийн дурсгалын хөшөөнд Немцовын дурсгалыг хүндэтгэхээр очсон гурван хүнийг цагдаа нар баривчилсан ч дараа нь сэрэмжлүүлэгтэйгээр сулласан гэж иргэний эрхийн байгууллагын "OVD-Info" мэдээлэв. Томск, Новосибирск, Екатеринбург, Нижний Новгород, Воронеж, Санкт-Петербург зэрэг хотуудад Немцовын дурсгалыг хүндэтгэх арга хэмжээ болсон байна. Эдгээр газруудын заримд нь цагдаа нар ажиллаж, цэцгийг холдуулсан аж.

Немцовын амийг хөнөөсөн хэргээр таван хүн шийтгүүлсэн боловч түүний гэр бүл болон дэмжигчид нь аллагын зохион байгуулсан хүн ямар ч шийтгэл хүлээгээгүй гэж мэдэгдсэн байдаг.