АНУ-ын ерөнхийлөгч Дональд Трамп цахим хуудсандаа Газын зурвасын сэргээн босголтын талаарх төсөөллөө бичлэг хэлбэрээр нийтэлжээ. Ойролцоогоор 30 секунд үргэлжлэх энэхүү бичлэгийг хиймэл оюун ухаанаар бүтээсэн байна.

Тус төсөөллийн бичлэгийг харвал одоогийн сүйрсэн Газын эрэг дагуу тэнгэр баганадсан барилгууд сүндэрлэжээ. Хамгийн анхаарал татаж буй нь тэнд Трампийн асар том алтан хөшөө болон "Трамп Газа" гэсэн бичээстэй өндөр зэрэглэлийн барилга харагдана. Мөн Трамп Израилийн ерөнхий сайд Беньяамин Нетаньяхутай усан сангийн эрэг дээр амарч буй, тэрбумтан Элон Маск бүжиглэж, нутгийн хоол амталж буй байдлаар бичлэгт дүрслэгджээ. Цаашилбал, тэнгэрээс унаж буй мөнгийг гараа сунган тосох хүүхдүүдийг харуулсан байна.

Бичлэгийн ард "Дональд Трамп чамайг эрх чөлөөтэй болгож, бүгдэд амьдрал бэлэглэх болно. Хонгил, айдас гэж дахиад байхгүй. Трампийн Газа эцэст нь сэргэлээ" гэж реп маягаар дуулах ажээ.

Дашрамд дурдахад, Трамп АНУ Газын зурвасыг урт хугацаанд эзэмшиж, дахин сэргээн босгоно гэж мэдэгдсэн. Мөн оршин суугчдыг нь өөр газар нүүлгэхийг санал болгожээ. Түүний хэлсэн үг Ойрхи Дорнод болон Европын удирдагчдын шүүмжлэлд өртөж байна. Тэд Трампийн санаачлагыг олон улсын хуулийг зөрчсөн санаа гэж үзэж байна.