“Мандухай цэцэн хатан” уран сайхны киноны Батмөнх даян хааны бага хатан Алтжин, “Ирж яваа цаг”-ын Солонгийн дүрээр монголчуудын зүрх сэтгэлд хоногшсон, Улсын драмын эрдмийн театрын жүжигчин Н.Отгонтогос Ерөнхийлөгчийн зарлигаар өнөөдөр/2025.02.27/ Монгол Улсын гавьяат жүжигчин цол хүртлээ.

Тэрбээр амьдралынхаа 40 гаруй жилийг урлагт зориулахдаа тайз, дэлгэцийн 120 гаруй бүтээлд дүрээ мөнхөлсөн юм. Анх 18 настайдаа Улсын драмын эрдмийн театрт цэвэрлэгчээр ажилд орж байсан бол дөрвөн жилийн дараа буюу 22 настайдаа “Мандухай цэцэн хатан” түүхэн уран сайхны киноны Алтжингийн дүрийг домог болтол бүтээж чадсан чадварлаг жүжигчин билээ.

Түүнийг монголчууд “Отгонтогос гэж дуудахаас илүүтэй Алтжин хэмээн авгайлах нь бий. Төрийн өндөр дээд шагнал хүртсэнийхээ дараа Монгол Улсын гавьяат жүжигчин Н.Отгонтогос “Найруулагч Б.Балжинням, И.Нямгаваа, Б.Баатар найруулагч нартаа маш их баярлаж байна. Мөн Төрийн шагналт, Ардын жүжигчин, Хөдөлмөрийн баатар Ц.Гантөмөр, У.Уртнасан багшдаа баярлалаа. Намайг дэмжиж, хөглөж ирсэн ах эгч, ханьдаа, намайг үргэлж хүндэлж, хайрлаж ирсэн Монголын ард түмэндээ маш их баярлалаа” хэмээсэн юм.

Г.ХОРОЛ