НЭМЭЛТ:

Ногоон автобусны хэргийн шүүх хурал түр завсарлав.

НЭМЭЛТ: 

Шүүх хурал эхэллээ. Шүүгдэгч "Тэнүүн-Огоо" ХК-ийн захирал А.Ганхуяг мэдүүлэхдээ "Нийтийн тээврийн салбарыг онцгой анхаарсан Ерөнхий сайд хоёрхон байдаг. Тодруулбал, С.Баяр, Л.Оюун-Эрдэнэ хоёр юм. Бид Ерөнхий сайд Л.Оюун-Эрдэнэд мэргэжлийн хүмүүсээр парк шинэчлэл хийлгэхээс гадна хятад автобус дахин худалдаж авмааргүй байна гэдэг хүсэлтийг тавьсан. Тэгэхэд төр, хувийн хэвшлийн түншлэлийн тухай хуулиараа 34/50 хувьтай байх ажлыг судлах үүргийг ЗГХЭГ-ын дарга асан Д.Амарбаясгаланд даалгасан байдаг" гэдгийг онцолсон юм. Тэгээд Д.Амарбаясгалан даргын өрөөнд хоёр удаа уулзаж, Түгжрэлийн сайд асан Ж.Сүхбаатарт парк шинэчлэлийн ажлыг хариуцуулж өгсөн. Төр, хувийн хэвшлийн корпораци байгуулах тухай уулзалтыг холбоон дээрээ хийсэн. Том оврын автобус холбооноос ажлын хэсэгт миний бие төлөөлөл болж, ажиллуулахаар болсон байдаг. Ингээд Ж.Сүхбаатар сайдтай уулзаж гарахад "Та нар худалдан авах автобусныхаа үнийн саналыг авч ирээрэй. Би "Daewoo" компанийн удирдлагатай очиж уулзсан. Надад цэнхэр өнгөтэй автобус санал болгож, танилцуулсан байдаг. БНСУ болон Вьетнамын 100 хувь хөрөнгө оруулалттай дэлхийн найман газар үйлдвэрлэлээ явуулдаг 106 автобусыг хамгийн хямд үнээр нийлүүлэх баталгааг өгч байна гэсэн. Гэтэл 2023 оны улсын төсөвт 318 тэрбум төгрөгийг суулгасан байдаг. Нийслэлийн бүх дарга нар байж, Ж.Сүхбаатар сайдтай уулзахад "Автобусныхаа бодит үнийг яаралтай танилцуул" гэсэн. Би тус компанитай холбогдоход 150 мянган ам.доллар байрлуул гэсэн. Тэгээд 83 мянган ам.доллараар худалдан авах бодит үнийг авсан. Манайд евро 5 хөдөлгүүртэй автобус ашиглах боломжгүй байдаг гэж танилцуулж байсан. Одоо Дарханд явж байгаа Skywell автобусыг би гэрээний хүрээнд оруулж ирсэн юм. Мөн дунд оврын автобусыг оруулж ирсэн, одоо нийтийн тээврийн үйлчилгээнд явж байгаа" гэв.

2024 оны арваннэгдүгээр сарын 12-ны өдөр "Daewoo BS106" маркийн автобусанд евро дизель түлш хийж дахин оношилгоонд оруулахад нийт 20 автобуснаас,

• хүхрийн агууламж 0.5-тай 19 автобус
• хүхрийн агууламж 0.6-тай 4 автобус
• хүхрийн агууламж 0.7-тай 3 автобус тус тус байна.

Хүхрийн агууламж нь 0.6-0.7-тай гарсан долоон автобуснууд нь энгийн түлшний үлдэгдэл дээр евро дизель түлштэй холилдсон учраас хүхрийн агууламж өндөр гарсан байх магадлалтай. Энэ нь "Daewoo bus zyle motors" компаниас ирүүлсэн баталгааны албан бичиг үнэн болохыг батлан харуулж байна. Энэ нь энэхүү 20 автобус нь Монгол Улсын стандартыг хангаж, бүрэн нийцсэн болохыг харуулж байна. Монгол Улсын стандарт нь хүхрийн агууламж 0.7 байдаг гэдгийг мэдүүлэгтээ дурдав.

НОГООН АВТОБУСНЫ ХУРАЛ 4 ДЭХ ӨДРӨӨ ҮРГЭЛЖИЛНЭ

Ногоон автобусны гэх тодотголтой А.Ганхуяг нарын 24 хүнд холбогдох шүүх хурал өнөөдөр/2025.02.27/ дөрөв дэх өдрөө үргэлжилнэ. Эхний өдөр хэргийн яллах дүгнэлтийг танилцуулсан бол үргэлжлүүлэн шүүгдэгчдийн мэдүүлгийг сонссон.

Нийтийн тээврийн парк шинэчлэлтийн ажлын хүрээнд 2023 онд нийслэлийн Засаг даргын Тамгын газар, “Тэнүүн-Огоо” ХХК-иуд худалдан авах гэрээг байгуулсан байдаг. Тодруулбал, их багтаамжийн дизель хөдөлгүүртэй 600 автобус, цахилгаан хөдөлгүүртэй 160 автобус, дунд багтаамжийн 50 автобус буюу нийт 810 автобус худалдан авахаар гэрээ байгуулсан. Улмаар худалдан авалттай холбоотой асуудал Авлигатай тэмцэх газар шалгагдаж, Чингэлтэй дүүргийн эрүүгийн хэргийн анхан шатны шүүхэд хэрэг шилжсэн.

“Тэнүүн-Огоо” ХХК-тай байгуулсан худалдан авах гэрээний улмаас нийт 134 тэрбум төгрөгийн хохирол учирсан гэдгийг албаныхан мэдээлж байв.

Гэтэл "Тэнүүн-Огоо" ХХК-ийн захирал А.Ганхуяг гадуур шалгагдаж, хэвлэлд ярилцлага өгч сууна. Тэрбээр "Би ногоон автобусаар ямар нэгэн цавчаа хийгээгүй. Шинжээчийн дүгнэлтээр ногоон автобуснууд шинэ гэдэг нь тогтоогдсон" гэв. Ногоон автобусны гэх хэргээс болж, УИХ-ын гишүүн Ж.Сүхбаатар Түгжрэлтэй тэмцэх сайдын албанаасаа чөлөөлөгдсөн бол Улаанбаатар хотын захирагчаар ажиллаж байсан Д.Сумъяабазар мөн өөрийн хүсэлтээр ажлаа өгсөн.

УИХ-ын гишүүн, сайд асан Ж.Сүхбаатарын хувьд “Автобус худалдан авахад миний оролцоо байгаагүй. Төсвийг нь шийдэж өгсөн. Худалдан авах ажиллагааг нийслэл зохион байгуулсан” гэж мэдэгдсэн. Харин Улаанбаатар хотын захирагч асан Д.Сумъяабазар мөн л өөрт нь хамааралгүйгээр энэ ажил явсан гэдэг агуулгатай тайлбар хийж байв.