Япон улсын гадаад паспорт дэлхийн хамгийн хүчирхэг паспортуудын нэг юм. Гэсэн хэдий ч тус улсын нийт иргэдийн зөвхөн 17 хувь нь үүнийг эзэмшдэг нь барууны орнуудтай харьцуулахад хамаагүй бага болохыг засгийн газар нь мэдээлжээ. Тодруулбал, Гадаад харилцааны яамны гаргасан тооцооллоор 2024 онд дотоодод 3.7 сая орчим гадаад паспорт олгосон нь өмнөх оныхоос 8.8 хувиар өссөн боловч 2019 онтой харьцуулахад 15.2 хувиар буурсан үзүүлэлт юм.

Тус улсын нийт хүчинтэй паспортын тоо 20.77 сая орчим байгаа нь хүн амын 16.8 орчим хувийг эзэлж байна. АНУ, Их Британи зэрэг нийт иргэдийн 50, 85 хувь орчимд байдаг аж.

Гэхдээ Японд гадаад паспорттой хүний тоо бусад улс оронтой харьцуулахад үргэлж бага байв. 2010-аад оны үед 22-24 хувьд нь гадаад паспорттой байсан бол "Covid-19" гарснаас хойш улам багассан юм. Судалгааг хариуцсан Гадаад хэргийн яамны ажилтан хэлэхдээ, засгийн газар Японы гадаад паспортын тоо яагаад бага байгааг бүрэн мэдэхгүй ч иений ханш сул байгаа тул олон хүн гадагшаа зорчих, суралцахад саад болдог гэж үздэг гэж тайлбарласан байна. Японы аялал жуулчлалын агентлагуудын нийгэмлэгийн (JATA) мэдээлснээр, тахлын үеэр Японд гурван жилийн турш хилийн хориг тавьсан нь иргэдийн, ялангуяа залуу үеийнхний аялах хүслийг улам бүр бууруулсан аж.

 "JATA"-гийн ерөнхийлөгч Хироюки Такахаши залуучуудын гадаадад аялах, бусад улс орнуудыг үзэх сонирхол буурч байгаа нь ирээдүйд Японы олон улсад өрсөлдөх чадварыг алдагдуулж болзошгүй гэж санаа зовниж байгаагаа илэрхийлжээ.