Өмнөд Солонгосын тэргүүн хатагтай Ким Кён Хи улс төрийн зуучлагч гэх Мён Тэ Кюнтэй утсаар ярьсан нь задарч, дахин маргаан дэгдээв. Тодруулбал, Ким, Мён нарын ярианы бичлэгийг Даваа гаригийн орой орон нутгийн "SisaIN" хэвлэл нийтэлжээ.

Дуудлагын үеэр тэд 2022 оны парламентын нөхөн сонгуулиар эрх баригч намаас нэр дэвшигчдийг хэрхэн сонгосон талаар ярилцсан байна. Бичлэг сонсвол Ким Кён Хи "Сонгогдсон ерөнхийлөгч сая утсаар ярихдаа намайг нэрийг нь хэлэх хэрэггүй гэсэн. Зүгээр л дамжуулаарай гэсэн" гэжээ. Мөн нэр дэвшүүлэх үйл явцыг зарим гишүүн эсэргүүцэж байгаа ч бүх зүйл сайхан болно гэж Мён Тэ Кюныг тайвшруулж байжээ.

Утасны дуудлага 2022 оны тавдугаар сарын 9-нд буюу Юн Сук Ёл ерөнхийлөгчөөр тангараг өргөхөөс нэг өдрийн өмнө болсон гэж таамаглаж байна. Маргааш нь болсон тангараг өргөх ёслолд Мён оролцсон. Эхлээд Юн Сук Ёл, Мён Тэ Кюн нар утсаар яриад, түүнээс 40 минутын дараа Ким Кён Хи, Мён Тэ Кюн нар нэр дэвшигчдийн талаар ярилцсан гэж үзэж байна.

Өмнөд Кёнсан мужийн Чанвон хотод амьдардаг, өөрийгөө улс төрийн зуучлагч гэж нэрлэсэн Мён нь Ардын хүч намын гишүүн асан Ким Ён Суныг 2022 оны парламентын нөхөн сонгуульд нэр дэвшихэд нь тусалж, 90 сая орчим вон авсан хэрэгт буруутгагдсан. Мён, Ким Ён Сун нарыг улс төрийн санхүүжилтийн хууль зөрчсөн хэргээр өнгөрсөн арванхоёрдугаар сард ялласан юм. Гэвч утасны яриа задарсан нь энэ хэргийг улам хүндрүүлэх магадлалтай болов. Учир нь төрийн албан хаагчид, тэр дундаа ерөнхийлөгч сонгуульд оролцох нь хууль бус үйлдэл.

"Dior" цүнхний хэрэг нь намжаад удаагүй байсан Ким Кён Хи ийнхүү дахин асуудалд орооцолдсоноор Юн Сук Ёлын импичментийн асуудал улам хүндрэх төлөвтэй байна.