АНУ, Украин улсууд байгалийн баялаг болон сэргээн босголтын хэлэлцээ хийхээр тохиролцлоо. Эх сурвалжийн хэлснээр хэлэлцээний нөхцөлд хүлээн авах боломжгүй зүйл огт байхгүй бөгөөд Украины аюулгүй байдал, энх тайванд оруулах хувь нэмрийг тодорхой зааж өгсөн аж. Украины ерөнхийлөгч Зеленский хэлэлцээ хийхээр удахгүй Вашингтоныг зорих төлөвтэй байна. Тэд Украины аюулгүй байдлын баталгааны талаар биечлэн ярилцах аж.

Энэ талаар Трамп мэдэгдэхдээ "Би түүнийг Баасан гаригт ирнэ гэж сонссон. Тэр өөрөө үүнийг хиймээр байгаа бол, гарын үсэг зурмаар байгаа бол надад асуудалгүй. Энэ бол маш том асуудал гэдгийг би ойлгож байна" гэжээ.

Украины сэргээн босголтын санд дэмжлэг үзүүлсний хариуд АНУ-д газрын ховор элементийг ашиглах эрх олгох гэрээ байгуулах тухай хэсэг хугацааны өмнөөс яригдсан. Тодруулбал, Трампийн засаг захиргаа Украинд үзүүлсэн тусламжийнхаа хариуд 500 тэрбум ам.долларын ашигт малтмалтын гэрээ байгуулахыг шаардсан ч Зеленский үүнийг няцааж байсан юм. Тэгвэл энэ хэлэлцээрийг Украин хүлээн зөвшөөрөхөд бэлэн байна гэж Даваа гаригт эх сурвалж мэдэгдсэний дараа албан ёсны мэдээлэл хэвлэлүүдээр гарчээ.