Ногоон автобусны гэх хэргийн шүүх хурал өнөөдөр /2025.02.26/ гурав дахь өдрөө үргэлжилнэ. Өнгөрсөн нэг жилийн хугацаанд шүүх хурал нь 12 удаа хойшилсон байдаг. Ногоон автобусны талаар яллагдагч, гэрчүүд юу гэж хэлснийг онцолж байна.

"БИ НОГООН АВТОБУС ХУДАЛДАН АВАХ АЖИЛД ОРОЛЦООГҮЙ"

Улаанбаатар хотын захирагчаар ажиллаж байсан Д.Сумъяабазар 2023 оны аравдугаар сарын 2-нд өөрийн хүсэлтээр ажлаа өгсөн. Тэрбээр өмнө нь надад хамааралгүйгээр энэ ажил явсан гэдэг агуулгатай тайлбар хийж байв. Шүүх хурал дээр улсын яллагч хэргийн яллах дүгнэлтийг танилцуулахдаа нийслэлийн Засаг дарга асан Д.Сумъяабазар гэрчээр оролцож байгааг онцолж, түүний мэдүүлгийг уншиж танилцуулсан юм.

Тэрбээр "Нийслэлийн нийтийн тээврийн газрын ажил урагшаа явахгүй байна, ажил нь унасан гэж олон хүн хэлж ярьж байсныг жирийн ард иргэд хүртэл шүүмжилж байсан. Тэгээд Ж.Сүхбаатар сайд надад Жавхлантбаатарыг санал болгож, цагдаа хүчний байгууллагад ажиллаж байсан тул хотын замын хөдөлгөөнийг сайн мэдэх хүн тул энэ хүнийг томилж өгөөч гэх саналыг тавьсан. Миний хувьд энэ саналыг нь хүлээн авч, ажил нь сайжрах боловуу гэж Жавхлантбаатарыг томилсон. Би "Тэнүүн-Огоо" компанийн эхний 20 автобус орж ирсэн гэдэг мэдээлэлтэй байсан. Түүнээс биш хүлээн авсан гэдгийг мэдээгүй. Евро 2 хөдөлгүүртэй автобус авсан гэдгийг бүр  ч мэдээгүй. Ямар ч байсан ногоон автобус ирж байгааг сонссон.

Ногоон автобус худалдан авах, нийлүүлэх ажилд оролцоогүй. Энэ асуудлыг тухайн үеийн төсвийг ерөнхийлөн захирагч хариуцаж байсан. Надад эрх шилжүүлсний дагуу захирамж гаргаж, ажлын хэсэг томилсноор миний ажил дууссан.

Бусад асуудлыг Сүхээ сайд хариуцан ажилласан. Захиалагчийн хяналтыг нийслэлийн Нийтийн тээврийн газраас тавьж байсан. Би Жавхлантбаатарт "Болгоомжтой байгаарай. Янз бүрийн юманд орооцолдов" гэж хэлж байсан. Би Жавхлантбаатарыг ажлаа Ж.Сүхбаатар сайдад танилцуулж байсныг мэдэж байсан. Эцсийн шийдвэрийг сайд гаргах учраас ажлаа танилцуул гэдэг байсан. Нийслэлийн төсөвт тусгасан бол энэ ажлыг хариуцах байсан. Намайг Москва яваад ирэх хооронд миний төсвийг задлаад хаясан байсан учраас энэ ажилд оролцоогүй" гэжээ.

"БИ ЗАХИАЛАГЧ, ТӨСВИЙН ЗАХИРАГЧ БИШ"

Нийтийн Засаг даргын хуулийн зөвлөх Д.Мөнх-Эрдэнийн хувьд шүүх хурал дээр "Миний хувьд нийслэлийн Засаг даргын 2022 оны арванхоёрдугаар сарын 23-ны өдрийн А/1620 гэсэн захирамжийн зөрчлийг хянасан үйлдэлтэй холбон буруутгагдаж байгаа. Энэ хэргийг шалгасан Эрүүгийн хэрэг хянан шийдвэрлэх ажиллагаа Эрүүгийн хуулийн 1.6 дугаар зүйлд заасан хууль ёсны байх үндсэн шаардлагыг хангаагүй. Өөрөөр хэлбэл, хэрэг хянан шийдвэрлэх ажиллагаа явуулахдаа Монгол Улсын Үндсэн хууль, Эрүүгийн хууль болон бусад хуулийг чанд сахих заалтыг зөрчсөн гэдэг байр суурьтай мэдүүлгээ өгч байгаа юм.

Яллах дүгнэлтэд намайг баахан хуулийн заалт зөрчсөн гэж бичсэн байна. Энэ заалтуудыг харахаар хуулийн зөвлөхтэй ямар ч хамаагүй төсвийн захирагч, захиалагч гээд этгээдэд хамаарах заалт. Би захиалагч, төсвийн захирагч биш зөвхөн нийтийн албан тушаалтан байгаа. Би "Тэнүүн-Огоо" компани бусад этгээдтэй огт хамааралгүй" гэсэн юм.

"НАМАЙГ ХУУЧИН АВТОБУС ОРУУЛЖ ИРСЭН ГЭЖ ЯЛЛАЖ БАЙГАА ЮМ УУ"