Цагаан сарын баяраар ирсэн гийчнийхээ гарын алгыг дээш нь харуулах, ахмад настнуудынхаа насыг хүндэтгэж золгоход шинэ мөнгөний хэрэгцээ их гардаг. Тэгвэл эрэлт дээр тулгуурлан гардаг нэг төрлийн үйлчилгээ бол шинэ мөнгө. 1000-20 мянган төгрөгийн шинэ дэвсгэртүүд ханшаа багагүй нугалж, амжиж халаасласан хүн хүү тооцож мөнгийг мөнгөөр зардаг үе иржээ.

Энэ жилийн тухайд золголтын шинэ мөнгийг 5-10 хувийн хүүтэй, мөн хүргэлттэй сольж байгаагаар онцлог байна.

Шинэ мөнгө солих үйлчилгээнээс иргэд хууль бус орлого олж байгаа бөгөөд энэ нь арилжааны банкууд болон төв банктай холбоогүй. Тиймээс хууль, дүрмээр ямар нэгэн зохицуулалт хийх боломжгүй юм.

Хүмүүс мөнгө л бол шинэ, хуучин нь хамаагүй гэдэг ч баяр дөхсөн өдрүүдэд хэн бүхэн л шинэ мөнгөн дэвсгэрт барьж золгохыг чухалчилдаг. Баярын өдрүүдэд томоохон зах худалдааны төвийн гадаа мөнгө сольдог байсан үе ард хоцорч одоо цахимаар хүртэл энэ үйлчилгээ эрэлттэй болжээ. Гэхдээ шимтгэлтэй сольж байгаа ч 500 мянган төгрөгөөс дээш сольж байгаа тохиолдолд хүргэлттэй гэдгийг цахим хуудаст бичсэн байна.

Тухайлбал, хүн 500 мянган төгрөг солиулах бол 50 мянган төгрөгийг шимтгэлд нь өгч шинэ мөнгөн дэвсгэрттэй болох юм.