Шинэ Зеландын Худалдааны сайд Эндрю Бэйли өнгөрсөн долоо хоногт ажилтныхаа гар дээр гараа тавьсан тул албан тушаалаасаа огцров. Тухайн ажилтны гарын дээд хэсэг буюу булчин орчимд Эндрю Бэйли гараа тавьсан нь “хэт даварсан” үйлдэл хийсэнд тооцогджээ.  Тэрбээр болсон явдалд гүнээ харамсаж буйгаа илэрхийлэхийн зэрэгцээ ямар нэгэн маргаан байгаагүй гэдгийг тодотгосон байна.

Эндрю Бэйли сайдын албан тушаалаас огцорсон ч засгийн газрын гишүүн хэвээр үлдэнэ.

Тэрбээр өмнө нь ч бас доод албан тушаалтанд зохисгүй хандаж байсан удаатай. Тодруулбал, өнгөрсөн оны аравдугаар сард Бэйли дарсны үйлдвэрийн ажилчдыг “хаягдагсад” гэж дуудаж, хуруугаараа духан дээрээ "L" үсэг үүсгэж харуулжээ. Энэ нь “Loser”  гэсэн утгыг илэрхийлэх дүрслэл юм. Үүнийхээ дараа тэр олон нийтэд хандаж уучлалт гуйж байжээ.

Ажилтны гар дээр гараа тавьсан явдал хоёрдугаар сарын 18-нд болжээ. Засгийн газар энэ асуудлыг долоо хоногийн дотор шийдвэрлэсэн нь “гайхалтай хурдан” байсан гэдгийг Шинэ Зеландын ерөнхий сайд Кристофер Луксон онцолжээ. Мөн Бэйли эргээд засгийн газрын өөр албан тушаалд томилогдох боломжтой эсэхийг түүнээс асуухад “Хэзээ ч гэдэг үгийг хэзээ ч битгий хэл” гэж хариулжээ.

Эндрю Бэйли анх 2014 онд Шинэ Зеландын парламентад одоогийн эрх баригч Үндэсний намын гишүүнээр сонгогдсон. Улмаар Худалдаа, хэрэглэгчийн асуудал эрхэлсэн сайд, Жижиг бизнес, үйлдвэрлэлийн сайд, Статистикийн сайдаар тус тус томилогдсон түүхтэй.