НЭМЭЛТ:

• Түгжрэлийн сайд асан Ж.Сүхбаатар
• Нийслэлийн Нийтийн тээврийн газрын дарга асан С.Жавхланбаатар
• Нийслэлийн Засаг даргын хуулийн зөвлөх асан Д.Мөнх-Эрдэнэ
• "Тэнүүн огоо" ХХК гүйцэтгэх захирал асан Ж.Эрдэнэбат
• "Тэнүүн огоо" ХХК ерөнхий захирал асан А.Ганхуяг
• Нийслэлийн худалдаа авах ажиллагааны газрын дарга асан Г.Энхтайван зэрэг 24 хүнийг энэ хэргээр шалгасан байдаг.

НЭМЭЛТ: Шүүх хуралдаан эхэлж, шүүгдэгчдийн яллах дүгнэлтийг танилцуулж байна.

ШҮҮХ ХУРАЛ ТҮР ЗАВСАРЛАЛАА

Ногоон автобусны гэх тодотголтой А.Ганхуяг нарын 24 хүнд холбогдох шүүх хурлыг өнөөдөр/2025.02.24/ товлосон. Хурал өдрийн 11.00 цагт эхэлсэн бөгөөд одоогоор түр завсарласан гэдгийг шүүхээс мэдээллээ. Завсарлагааны дараагаар хэргийн яллах дүгнэлтийг танилцуулна гэв.

Нийтийн тээврийн парк шинэчлэлтийн ажлын хүрээнд 2023 онд нийслэлийн Засаг даргын Тамгын газар, “Тэнүүн-Огоо” ХХК-иуд худалдан авах гэрээг байгуулсан байдаг. Тодруулбал, их багтаамжийн дизель хөдөлгүүртэй 600 автобус, цахилгаан хөдөлгүүртэй 160 автобус, дунд багтаамжийн 50 автобус буюу нийт 810 автобус худалдан авахаар гэрээ байгуулсан. Улмаар худалдан авалттай холбоотой асуудал Авлигатай тэмцэх газар шалгагдаж, Чингэлтэй дүүргийн эрүүгийн хэргийн анхан шатны шүүхэд хэрэг шилжсэн.

“Тэнүүн-Огоо” ХХК-тай байгуулсан худалдан авах гэрээний улмаас нийт 134 тэрбум төгрөгийн хохирол учирсан гэдгийг албаныхан мэдээлж байв.

Гэтэл "Тэнүүн-Огоо" ХХК-ийн захирал А.Ганхуяг гадуур шалгагдаж, хэвлэлд ярилцлага өгч сууна. Тэрбээр "Би ногоон автобусаар ямар нэгэн цавчаа хийгээгүй. Шинжээчийн дүгнэлтээр ногоон автобуснууд шинэ гэдэг нь тогтоогдсон" гэв. Ногоон автобусны гэх хэргээс болж, УИХ-ын гишүүн Ж.Сүхбаатар Түгжрэлтэй тэмцэх сайдын албанаасаа чөлөөлөгдсөн бол Улаанбаатар хотын захирагчаар ажиллаж байсан Д.Сумъяабазар мөн өөрийн хүсэлтээр ажлаа өгсөн.

УИХ-ын гишүүн, сайд асан Ж.Сүхбаатарын хувьд “Автобус худалдан авахад миний оролцоо байгаагүй. Төсвийг нь шийдэж өгсөн. Худалдан авах ажиллагааг нийслэл зохион байгуулсан” гэж мэдэгдсэн. Харин Улаанбаатар хотын захирагч асан Д.Сумъяабазар мөн л өөрт нь хамааралгүйгээр энэ ажил явсан гэдэг агуулгатай тайлбар хийж байв.