Монголчуудын уламжлалт сар шинийн баяр амралтын өдрүүдэд таарч байгаатай холбоотойгоор оюутнууд шинийн 4, 5-ны хичээлийг цахимд шилжүүлэх, дараа нь нөхөж оруулах санал, хүсэлтүүдийг сургууль тус бүрийнхээ захиргаанд гаргаад байгаа талаар бид өнгөрсөн долоо хоногт мэдээлсэн. Тэгвэл өнөөдрөөс /2025.02.24/ зарим их сургууль оюутнуудын саналыг харгалзаж, дотоод зохицуулалт хийж эхэлжээ.

Тодруулбал, Монгол Улсын Их сургууль, Монгол Улсын Боловсролын Их сургууль дотоод зохицуулалтаар битүүний өдөр оюутанд чөлөө олгох, шинийн 4,5-ны Даваа, Мягмар гаригийн хичээлийг цахимд шилжүүлэх зохицуулалт хийсэн байна.

Мөн Шинжлэх ухаан технологийн их сургууль цагаан сарын өдрүүдийн хичээлд зохицуулалт хийжээ. Бусад их, дээд сургуулийн оюутны холбоо мөн захиргаа хуралдаж шийдвэрүүдээ дотоод зохицуулалтаар гаргахаар болжээ.