Германы канцлер Олаф Шольц эвслийн засгийн газраа тараасны улмаас тус улсын бүх нийтийн сонгууль хоёрдугаар сарын 23-нд болсон. Урьдчилсан санал асуулгаар сөрөг хүчин давамгай байсан нь сонгуулийн өдөр ч мөн батлагдлаа. Тодруулбал, Канцлер Шольцийн Социал Демократ нам урьдчилсан санал хураалтаар гуравт жагсч, Христийн ардчилсан холбоо нам тэргүүлж байв.

Өнөөдөр сонгуулийн эцсийн дүн гарч, таамаглаж байсанчлан Христийн ардчилсан холбоо нам ялалт байгуулж, Фридрих Мерц дараагийн канцлер болох нь тодорхой боллоо. Германчууд Фридрих Мерцийг Европын хямралыг арилгах ерөндөг гэлцэж буй талаар бид өмнө нь онцолсон билээ. 

Ялалтын эзэн Фридрих Мерц "Өнөө орой баяраа тэмдэглээд, маргааш өглөөнөөс ажилдаа орно. Миний өмнө хүлээж буй үүрэг хариуцлагаа ухамсарлаж байна" гэжээ.

Сонгуулийн дүнг танилцуулбал, Христийн ардчилсан холбоо нам 28.6 хувь, хэт барууны үзэлт "AfD" нам 20.8 хувь, хуучин эрх баригч Социал Демократ нам 16.4 хувийн санал авсан юм. Социал Демократ намын хувьд энэ нь түүхэн доод үзүүлэлт боллоо. Даваа гаригийн үүрээр урьдчилсан дүн гарахад "AfD" нам харьцангуй өндөр үзүүлэлттэй байсан тул тус намаас нэр дэвшигч Алис Вейдел итгэл найдвар дүүрэн байжээ. Тэрбээр Фридрих Мерцийн эвсэл байгуулах оролдлогыг бүтэлгүйтнэ гэж хэлсэн боловч удалгүй сонгуулийн газрын зураг өнгөө өөрчилж эхэлсэн байна.

Албан тушаалаасаа огцорсон Олаф Шольц эвсэл байгуулах хэлэлцээрт оролцохгүй гэж мэдэгджээ.