XVII жарны "Элдэв эрдэнэт" хэмээх модон могой жилийн сар шинийн баярыг тохиолдуулан Монгол Улсын Ерөнхийлөгч зарлиг гаргаж, боловсрол, соёл урлаг, спорт, эрүүл мэнд, шинжлэх ухаан, эрчим хүч, мал аж ахуй, төрийн байгууллагад олон жил үр бүтээлтэй ажилласан хүмүүст Монгол Улсын Төрийн дээд цол, одон медаль хүртээдэг уламжлалтай. Энэ жил цагаан сарын баярын өмнө урлагийн салбарынхан үтгон Ардын жүжигчин, Гавьяат жүжигчнээ хүлээн авах нь ээ.

Тодруулбал, УДЭТ-ын жүжигчин Ж.Оюундарийг театрын урлагт оруулсан хувь нэмэр, хичээл зүтгэл, бүтээсэн дүрүүдийг нь үнэлэн Монгол Улсын төрийн дээд шагнал “Ардын жүжигчин” цолоор, УДЭТ-ын жүжигчин М.Түвшинхүү, О.Гэрэлсүх нарыг театрын урлагт оруулсан хувь нэмэр, хичээл зүтгэл, бүтээсэн дүрүүдийг нь үнэлэн Монгол Улсын төрийн дээд шагнал Гавьяат жүжигчин цолоор шагнахаар болжээ. Мөн “Мандухай цэцэн хатан” түүхэн уран сайхны киноны Алтжингийн дүрээр үзэгч олныхоо сэтгэлд хоногшсон жүжигчин Н.Отгонтогос Монгол Улсын Гавьяат жүжигчин цол тэмдгээр энгэрээ мялаахаар болсон байна.

Монгол Улсын Ардын жүжигчин Лоолийн Жамсранжав 1936 оны наймдугаар сарын 4-нд Ховд аймгийн Мянгад сумын Их арал гэдэг газар төрсөн. Тэрээр 1957 онд урлагийн сургуулийг найруулагч мэргэжлээр төгссөн бөгөөд 1957 оны наймдугаар сараас 11 сар хүртэл Өвөрхангай аймгийн соёлын ордонд найруулагч, 1957 оноос УДЭТ-т жүжигчнээр ажиллажээ. Нэрт жүжигчин Л.Жамсранжав нь Ж.Мольер “Скапены дамшиглал” жүжгийн Октав, Ф.Шиллер “Хар санаа, хайр сэтгэл” жүжгийн Фердинанд, У.Шекспир “Отелло” жүжгийн Родриго, Яго, “Лир ван” жүжгийн Францын хаан, “Гамлет” жүжгийн Гамлет, Э.Войныч “Овод” жүжгийн Овод, Б.Лхагвасүрэн “Тамгагүй төр” жүжгийн Арчуг зэрэг гол дүрийг бүтээж, 100 гаруй жүжигт оролцон тоглосон байна.

Түүний урлагт оруулсан их хувь нэмрийг төр өндрөөр үнэлж 1981 онд Монгол Улсын Гавъяат жүжигчин, 1996 онд Монгол Улсын Ардын жүжигчин цолоор шагнажээ.

Ардын жүжигчин Л.Жамсранжав агсны анхны гэргий Ө.Уранчимэг хэмээх хатагтай бий. Олон жил ханилж амьдралын жаргал зовлонг хамт туулахдаа зургаан хүүхэд төрүүлснээс урлагийн хүн болсон нь Гавьяат жүжигчин Ж.Оюундарь. Түүний охин Ж.Оюундарь удамшсан авъяасаа ургуулж, үргэлжлүүлж яваа Монголын ард түмний хайртай уран бүтээлч билээ. “Л.Жамсранжав бол эхийн хэвлийд яс, цуснаас бүрэлдэн ургасан “алт”. Энэ тунгаамал алтаар Монголын театр Гамлет, Фердинанд, Овод, Яго, Ишхүүг цутгасан. Ийм жүжигчин Монголын театр, урлагт дахин заяах эсэхийг бурхнаас асуу” хэмээн Төрийн шагналт, Ардын уран зохиолч Б.Лхагвасүрэн нэгэнтээ хэлсэн байдаг.