Сар шинийн баяртай холбоотойгоор хоёрдугаар сарын 22-27-ний хооронд автомашинуудыг улсын дугаарын тэгш сондгойгоор ангилан замын хөдөлгөөнд оролцуулах болсон. Тиймээс өнөөдөр /2025.02.24/ сондгой тоогоор төгссөн улсын дугаартай автомашин замын хөдөлгөөнд оролцоно. Тодруулбал, энэ сарын 22, 24, 26 ны өдрүүдэд сондгой, 23, 25, 27-ны өдрүүдэд тэгш тоогоор төгссөн машинууд замын хөдөлгөөнд оролцох юм. Хэдий дугаарын хязгаарлалт үйлчилж эхэлсэн ч иргэд санаатай болон санамсаргүй байдлаар замын хөдөлгөөнд оролцох тохиолдол цөөнгүй гарч байгаа аж.

Тээврийн цагдаагийн албанаас тодруулснаар "Хязгаарлалтын бүс дотор хотхон хороолол дундаас гарч ирээд хөдөлгөөнд оролцоод байгаа тохиолдлууд гарч байна. Тэр тохиолдлуудад зөрчлийн хуулийн 14.7.57 заалтаар хариуцлага тооцож байгаа. Торгуулаад цааш явбал дараагийн цагдаа ахиад торгоно" гэлээ.

Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн Г.Отгонтамир мэдээлэхдээ "Үндэсний их баяр наадам болон сар шинийн баяр дөхөхөөр замын хөдөлгөөний ачаалал эрс нэмэгддэг тул улсын дугаарын тэгш сондгой хязгаарлалтыг үе шаттайгаар зохион байгуулж ирсэн. Нийслэлийн Засаг даргын гаргасан захирамжийн дагуу хоёрдугаар сарын 22-27-ний өдрийн хүртэлх хугацаанд зургаа хоног өглөөний 08:00 цагаас оройны 20:00 цаг хүртэл  хязгаарлалт хийх гэж байна.  Өвлийн бүсчлэл хэвээрээ. Таван Шарын уулзвараас зүүн тийш Чулуун-Овооны уулзвар. Хойшоо 32-ын уулзвар. Урд хэсэг МИС -ийн уулзвар, 120 мянгатын уулзвар байгаа. Нэмэгдсэн нь МИС -ийн уулзвараас 19-ийн үйлчилгээний төвийн Дунд голын зам нэмэгдсэн. Мөн Махатма Гандигийн гудамж нэмэгдсэн. Урагшаа И Мартын уулзвар хүртэлх зам нэмэгдсэн. Иргэд та бүхэн зургаа хоногийн хугацанд тэгш сондгойгоор хөдөлгөөнд оролцохдоо цагдаагийн албан хаагчийн тавьсан хууль ёсны шаардлагыг биелүүлж хөдөлгөөндөө соёлтой оролцоорой" хэмээн уриалсан юм.