АНУ-ын Олон улсын тусламжийн агентлагийн олон мянган ажилтан Трампийн засаг захиргааны шийдвэрээр халагдсан. Тэд Баасан гаригт Вашингтон Д.С. дахь оффисоо орхин явжээ. Эд зүйлсээ баглан гарах ажилтнууд "Бид дэлхийг орхиж байна", "Та АНУ-ын Олон улсын тусламжийн агентлагаас хүмүүнлэгийн ажилтнуудыг нь явуулж болно. Гэхдээ хүн төрөлхтөнөөс хүмүүнлэг байдлыг салгаж авч чадахгүй" гэх зэргээр Трампад хэлэх үгээ хайрцагнууд дээрээ бичжээ. Зарим ажилтан оффисоо орхин гарахдаа уйлж явааг зургаас харж болно.

Халагдсан ажилтнуудыг АНУ-ын Олон улсын тусламжийн агентлагийг дэмждэг олон иргэн сайн дураараа оффисын гадна угтан авчээ. Тэд мөн "Бид АНУ-ын Олон улсын тусламжийн агентлагт хайртай", "Үйлчилгээнд тань баярлалаа" гэх зэрэг бичиг барьсан байв.

Одоогоор тус байгууллагад 8000 орчим ажилтан харьяалагддаг. Эндээс 300 хүрэхгүй ажилтан л ажилтайгаа үлдэх төлөвтэй байна. Цаашид гадаадын улс орнуудад хэрэгжүүлдэг цөөн хэдэн хөтөлбөрөө л тус агентлаг үргэлжлүүлнэ.

Элон Маск тэргүүтэй Засгийн газрын үр ашгийн хэлтэс АНУ-ын Олон улсын хөгжлийн агентлагийг үргүй зардал гаргасан гэж шүүмжилсэн билээ. Энэ хүрээнд "Газад төвтэй терроризмын эсрэг буяны байгууллага"-д 900 мянга гаруй ам.доллар, "Сербийн ажлын байр, бизнесийн хамтын нийгэмлэгийн олон талт байдал, тэгш байдал, оролцоог нэмэгдүүлэх" зорилготой 1.5 сая ам.долларын хөтөлбөр, Иракт "Sesame" гудамжны шоуг зохион байгуулахад 20 сая ам.доллар зэрэг эргэлзээтэй зардлын хэд хэдэн жишээг дэлгэн тавьжээ.