“Амар байна уу” үзэсгэлэнд Элчин сайд, төлөөлөгчид зочилж байна

Сар шинийн баярт зориулсан “Амар байна уу” өргөтгөсөн худалдаанд Монгол Улсад суугаа гаднын Элчин сайдууд, төлөөлөгчид өнөөдөр /2025.02.23/ зочиллоо. Нээлтийн арга хэмжээнд нийслэлийн Сонгинохайрхан дүүргийн Соёлын төвийн уран бүтээлчид ая дуугаа өргөж, уран бүтээлийн дээжээ өргөлөө.

Нийслэлийн Жижиг, дунд үйлдвэр, үйлчилгээг дэмжих төв” НӨҮГ-ын дарга Д.Ундармаа:

-"Амар байна уу" өргөтгөсөн худалдаа эхэлснээр олон төлөвлөгөөт ажлыг зохион байгуулдаг. Энэ удаа Монгол Улсад суугаа Элчин сайдын яамны ажилтнуудтай хамтран ажиллаж байна. Энэ удаа АНУ, Турк улсын Элчин сайдын яамнаас гадна НҮБ-ын Хүүхдийн сангийн төлөөлөгчид, нийслэлийн харьяа байгууллагын дарга нар хүрэлцэн ирээд байна. Нийслэлийн хэмжээний 1000 үйлдвэрлэгч түрээсийн төлбөргүйгээр 50 мянган нэр төрлийн бараа бүтээгдэхүүнээ худалдаалж байна. Энэ жилийн сар шинийн баярт зориулсан өргөтгөсөн худалдаагаа "Их наяд" худалдааны төв болон "Соёолж" төвтэй хамтран зохион байгуулж байна. Тусдаа брэндбүүктэйгээс гадна бараа бүтээгдэхүүнээ үйлдвэрийн үнээр зарж байгаагаараа онцлог. Та бүхэн маань энэ өргөтгөсөн худалдаагаар тухтай зочлохыг хүсч байна гэв.

Эдийн засгийн эргэлтийг нэмэгдүүлэх, үндэсний үйлдвэрлэгчдээ дэмжих, тэдэнд хамтран ажиллах нөхцөл бүрдүүлэх зорилгоор нийслэлээс “Амар байна уу” өргөтгөсөн үзэсгэлэн худалдааг гурав дахь жилдээ зохион байгуулж байгаа билээ.

Тус үзэсгэлэн худалдаа хоёрдугаар сарын 27-ны өдөр хүртэл өдөр бүр “Их наяд” худалдааны төвийн 5-6 давхар, “Соёолж молл” худалдааны төвийн хоёрдугаар давхарт 09:00-20:00 цагийн хооронд үргэлжилнэ.

Нийслэлийн зүгээс ЖДҮҮ эрхлэгчдээс түрээсийн төлбөр авалгүй, урсгал зардлыг хариуцаж байгаа юм. Монголчууд сар шинийн хэрэгцээндээ зориулан 1.3 их наяд төгрөг зарцуулдаг гэсэн судалгаа бий. Үүний 70 гаруй хувийг нь импортын бүтээгдэхүүн худалдан авч гадаад руу урсгадаг байна. Тус өргөтгөсөн худалдааг зохион байгуулснаар дээрх мөнгийг эх орондоо үлдээх боломжтой болж буй.

2 сэтгэгдэл

Хариулахаа болих

Зочин 1 цагийн өмнө 139.5.217.147

Энэ хүүхдийн сан гэж нэг хэрэгтэй хэрэггүй юманд орж явдаг газар байнаа. Яг хүүхдэд хэрэгтэй нэг ч юм хийхгүй. Өөрсдөдөө амар, нэр нүүр гарчихаар юмнууд дээр л шоу хийхээр боллоо. Энд тэндгүй хүүхдийн нэр барьж том компаниудаас мөнгө авна. Баахан хэрэгтэй хэрэггүй зөвлөх нэртэй хүмүүст тэр мөнгийг нь өгөөд хэдэн ном, реклам хийгээд дуусдаг газар.