Улс орноо хөгжүүлэх зорилго дор МАН, АН, ХҮН нам хамтран Засгийн газраа байгуулсан ч сахил хүртээд шал дордов гэгч нь болж байна. Учир нь, гурван нам тус бүрийн төлөөллөө “Эрдэнэт” үйлдвэрээс эхлэн төрийн өмчит бүхий л компаниудад томилж, орон тоог нь данхайлгасан бол сүүлдээ төрийн алба руу орж бужигнуулж эхлэв.

Тухайлбал, Засгийн газрын энэ сарын 19-ний өдрийн хуралдаанаар Хүүхэд гэр бүлийн хөгжил хамгааллын ерөнхий газрын даргаар УИХ-ын гишүүн асан Б.Баярсайханыг томилжээ.

Тэрбээр 2020-2024 онд УИХ-ын гишүүнээр ажиллаж байсан бөгөөд 2024 оны сонгуульд өрсөлдсөн ч ялагдсан юм. МАН-ын сонгуульд ялагдсан бүсгүйчүүд намын удирдлагуудаасаа ажил горилон амар заяа үзүүлэхгүй болсон тухай “жиргээ” Төрийн ордноор нисэж байсан нь ийнхүү ажил хэрэг болов.

Хөрөнгө мөнгө ихтэй төрийн байгууллага бараадсан энэ үйлдлийг нь ажил хийж, ачаа үүрэх гэхээс илүү ашиг хонжоо хайж очсон байх вий гэдэг хардлага ч араасаа дагуулаад байна.

Тэгвэл Ардчилсан намаас Аж үйлдвэр эрдэс баялгийн сайдаар томилогдсон сайд Ц.Туваан ч зүгээр суусангүй, хуурай дүү Г.Ган-Одыгоо Дорнод аймгийн Матад, Халх гол суманд газрын тос олборлох чиглэлээр үйл ажиллагаа эрхэлдэг “Петрочайна дачин тамсаг” ХХК-ийн эзэмшиж байгаа 19, 21 дүгээр талбайд Монгол Улсын Засгийн газрыг төлөөлж ажиллах төлөөлөгчөөр томилсон нь шуугиулж байна. Адууных нь жүчээг хариуцаж ирсэн Г.Ган-Од нэг л өдөр Засгийн газрын төлөөлөгч болж томорсон нь “Түгжил хочит Ж.Батзанданг Засгийн газрын БЭТ-ээр томилсонтой агаар нэг зүйл боллоо” гэж шүүмжлэх хүн олон байгаа юм.

Томилгоог хийхдээ мэргэжил, мэдлэг, туршлага харахаас илүү танил тал, шантааж, нам дагасан улс төрийн томилгоог хийх болсон нь эцэстээ төр хүчгүйдэж, нэр хүндээ ч алдах шалтаг шалтгаан болж буйг сануулах хүн олон болсон.

Гэвч Засгийн газраас  хийх томилгоо цаашид ч үргэлжилнэ. Тухайлбал, орон нутгийн өмчит "Багануур" ХК-ийн дэд дарга нарыг МАН, АН, ХҮН намаас шинэчлэн томилохоор хүн дээрээ тохирсон байдаг. Тодруулбал, Ардчилсан намаас Улсын заан Д.Бумбаярын эхнэр Ц.Одонтунгалагийг, ХҮН намаас НИТХ-ын төлөөлөгч Д.Гантулга,  МАН-аас Т.Отгонболд нарыг тус компанийн дэд даргаар томилохоор хүлээгдэж буй.

Удахгүй хаврын чуулган эхэлнэ. Хаврын чуулганаар Элчин сайд нарыг томилох асуудлыг хэлэлцэх бөгөөд бас л нам дагасан, сонгуульд өвдөг шороодсон улстөрчдийг нэр дэвшүүлж, Монголын гадаад бодлогыг бужигнуулах чимээ дуулдаж байгаа юм.

Г.ХОРОЛ