Хонконгийн ардчиллыг дэмжигч хамгийн том бүлэг болох Демократик нам тарах шийдвэр гаргажээ. Бээжингийн зүгээс эсэргүүцэгчдийг нухчин дарах кампанит ажиллагаа явуулж буй энэ үед тус нам тарж буй иргэдийн түгшүүрийг нэмэгдүүлээд байна.

Хонгконгод 2020 онд Үндэсний аюулгүй байдлын тухай хууль хэрэгжиж, тус улсын сонгуулийн тогтолцоог Хятадыг дэмжигч улстөрчдийн талд шилжүүлсэн байдаг. Үүний улмаас Демократик нам парламентад бүх суудлаа алдсан юм. Өнгөрсөн арваннэгдүгээр сард тус намын дөрвөн гишүүнд хорих ял оноосон бөгөөд бусдын урвуулах зорилгоор хуйвалдаан зохион байгуулсан хэрэгт буруутгасан байдаг.

Демократик намын ахмад гишүүд Пүрэв гаригт /2025.02.20/ хуралдаж, татан буулгах шийдвэр гаргасан аж. Гэхдээ бүрэн тарахын тулд Үндэсний ассамблейд байх гишүүдийн 75 хувь нь шийдвэрийг дэмжсэн байх шаардлагатай. Демократик намын зүгээс яагаад тарах болсон шалтгаанаа бүрэн тайлбарлаагүй юм.

Гэхдээ эрх баригчдын зүгээс ирэх дарамт шахалт нь тус намд улс төрийн үйл хэргээ үргэлжлүүлэх боломжийг нь хязгаарлаж байсантай холбоотой гэж ажиглагчид үзэж байна.

Хонгконгийн Демократик нам 1994 онд буюу тус бүс нутаг Британийн засаглалаас Хятадад шилжүүлэгдэхээс өмнө байгуулагджээ. Мөн байгуулагдсан цагаасаа хойш "Нэг улс, хоёр систем" зарчмын дагуу Хонконгт ардчиллын төлөө үйл ажиллагаа явуулж байв.  Аюулгүй байдлын тухай хууль хэрэгжиж эхэлсний дараа ч ялгаагүй Демократик нам Хонконгийн засгийн газраас боловсруулсан төсвийн төслийн талаар саналаа илэрхийлж, анхан шатны үйл ажиллагааг үргэлжлүүлж байсан.

Дашрамд дурдахад, Хонконгийн ардчиллын төлөөх олон нам, бүлэг аль хэдийн татан буугдсан байдаг. Хэрэв Демократик нам албан ёсоор тарах юм бол Хонгконгийн өмнөөс Хятадын засгийн газрын эсрэг үг дугарах улс төрийн хүчин үндсэндээ байхгүй болно.