Австрали улс Хятадын тэнгисийн сургуулилтын талаар анхааруулжээ

Австралийн агаарын хөдөлгөөний удирдлагын агентлаг бүс нутгийн агаарын тээврийн компаниудтай холбогдож анхааруулга өгч байна. Учир нь Хятадын тэнгисийн цэргийн хүчний сургуулилт болж байгаа аж.

Өнгөрсөн долоо хоногт Ардын чөлөөлөх армийн Тэнгисийн цэргийн фрегат, крейсер болон дүүргэгч хөлөг онгоц Австралийн тэнгисийн эрэг рүү нэвтэрсэн байна. Мөн энэ долоо хоногт Австрали, Шинэ Зеландын тэнгисийн цэргийн болон Агаарын цэргийн хүчний хяналт дор Австралийн зүүн эрэг дагуу сургуулилт хийжээ. "Sydney Morning Herald" сонинд мэдээлснээр, Хятад улс Австралийн эрх баригчдад Баасан гаригт Шинэ Өмнөд Уэльсийн эрэгт сургуулилт хийхээ мэдэгдсэн байна.

Гэсэн хэдий ч сургуулилтын үеэр гал нээсэн нь эрх баригчдын дургүйцлийг хүргээд байна.

Агаарын хөдөлгөөний удирдлагын агентлаг "Airservices Australia" өнөөдөр /2025.02.21/ хийсэн мэдэгдэлдээ “Тэнгисийн зурваст гал нээсэн байж болзошгүй мэдээллийг Иргэний нисэхийн ерөнхий газар болон Австралийн Агаарын үйлчилгээний агентлаг хүлээн авсан. Урьдчилан сэргийлэх үүднээс бид агаарын тээврийн компаниудад тус бүсэд нислэг хийхээр төлөвлөж байгаа бол анхаарал болгоомжтой байхыг сануулсан" гэв.

Агаарын тээврийн "Qantas" болон хямд өртөгтэй "Jetstar" компани агаарын орон зайг хянах болжээ. Мөн тус хоёр компани Австрали, Шинэ Зеландын хооронд Тасманы тэнгисээр дамжин өнгөрөх зарим нислэгтээ төлөвлөгөөнд өөрчлөлт оруулсан байна.

Гадаад хэргийн сайд Пенни Вонг тэнгисийн хил дээр гал нээсэн асуудалд Хятадын ажлын хэсэг оролцсон гэдгийг баталсан байна. Тэрбээр "ABC" телевизэд өгсөн ярилцлагадаа "Миний ойлгож байгаагаар тэд олон улсын усан хил дээр цэргийн үйл ажиллагаа явуулж байна. Бид хятадуудтай энэ талаар ярилцах бөгөөд эдгээр сургуулилттай холбоотой нөхцөл байдлыг, тухайлбал галын сургуулилттай холбоотой мэдэгдлийг цаг тухайд нь авч, бүх зүйлд ил тод байхыг хүсэх болно" гэжээ.

ЭХ СУРВАЛЖ: CNN