Дорноговь аймгийн Замын-Үүд суманд амьдардаг Т.Нэргүй өнөөдөр/2025.02.21/ сэтгүүлчдэд мэдээлэл хийлээ.

Тэрбээр “Хоёр жил орчмын хугацаатай би гаалийн байгууллагын болж бүтэхгүй байгаа зүйлтэй тэмцлээ, одоо хүчин мөхөстөөд байна. Гаалийн ерөнхий газрын дарга Р.Отгожаргалын төрсөн эгч Р.Бурмаа нь дүүгийнхээ албан тушаалыг ашиглаж, Замын-Үүдийн гаалийг захирдаг болсоор удлаа. Р.Бурмаа “Одоо энэ машиныг гарга, одоо тэр машиныг оруул” гэж гаалийн байцаагчдыг захирдаг. Мөн иргэдийн талаар гаалийнханд матаж, шантааж хийн үйл ажиллагааг нь доголдуулж байгаа нь ноцтой асуудал юм.

Замын-Үүдийн гаалиар нэвтрэхдээ иргэн, аж ахуй нэгжүүд 12, 13 сая төгрөгийн татвар төлж байхад Р.Бурмаа ачаа бараагаа шалгуулахгүй нэвтэрдэг. Надад түүнтэй холбоотой маш олон баримт байна. Энэ мэдээллийг би одоо олон нийтэд ил болгоход хувь хүний нууц задруулсан болох учраас мэдээлэх боломжгүй. Мөн миний амь нас, гэр бүлийнхнийх маань амь нас ч эрсдэлд орж болзошгүй тул хуулийнхны хамгаалалтад орохыг хүсч байна. Тэр хүнээс би айж байна. Надтай хамт энэ асуудлаар шүгэл үлээх хүмүүс байсан ч гааль дээр ачаа бараа маань саатаж болзошгүй гээд больсон. Дүүгийнхээ албан тушаалыг ашиглаж, монополддог Р.Бурмаагийн асуудлыг хуулийн байгууллага анхааралдаа аваасай гэж хүсэж байна.

Хуулийн байгууллагад тэр гар хөлтэй.

Гаалийн байгууллага иргэн бүрт тэгш үйлчлэх ёстой. Гэтэл Замын-Үүдийн гааль хүн хүн дээр өөр, өөр шалгалт явуулж, авлига өгснийг нь хөнгөвчилж, авлига өгөөгүйг нь шантаажилж зогсоодог. Энэ асуудлыг Ерөнхий сайд анхааралдаа авч шалгалт хийхийг хүсч байна” гэлээ.

Г.ХОРОЛ