Өмнөд Солонгосын бүрэн эрхээ түдгэлзүүлээд буй ерөнхийлөгч Юн Сук Ёл бослого удирдсан хэргээр өнөөдөр /2025.02.20/ эрүүгийн хэргийн анхан шатны шүүх хуралдаанд оролцсон байна. Энэхүү үйл явдал нь түүнийг Өмнөд Солонгосын түүхэн дэх хамгийн анхны эрүүгийн хэргээр шүүгдэж буй ерөнхийлөгч болгожээ. 2024 оны арванхоёрдугаар сард цэргийн онц байдал зарласны улмаас Юны эсрэг импичмент санал хураалт явуулсан байдаг. Улмаар түүнийг Авлигатай тэмцэх газар хоёр удаагийн оролдлогоор баривчилж, бослого гаргасан хэргээр шүүх болсон юм. Уг хэргийн улмаас Юны ерөнхийлөгчийн халдашгүй эрхийг халах болсон бөгөөд хэрэв гэм буруутай нь тогтоогдвол бүх насаар нь хорих юм уу цаазаар авах ял авч магадгүй.

Урьдчилсан шатны шүүх хурал Сөүл хотын төв дүүргийн шүүхэд орон нутгийн цагаар өглөөний 10:00 цагт эхэлж, ердөө 13 минутын дотор өндөрлөжээ. Дараагийн шүүх хурлыг гуравдугаар сарын 24-нд хийхээр товлосон байна.

Шүүх хурлын үеэр Юны өмгөөлөгчид түүнийг буруутгаж буй бүх хэргийн нарийн ширийн мэдээллийг нягтлах шаардлагатай байгаа тул дараа нь өмгөөллөө танилцуулна гэж мэдэгджээ. Тэд мөн Юны хэргийг Батлан ​​хамгаалахын сайд асан Ким Ён Хёны хэрэгтэй хавсаргах талаар мэдэгдэл гаргаагүй байна. Харин прокурорын зүгээс шүүх хурлыг тусад нь явуулах нь илүү үр дүнтэй гэж үзэж, Юн болон Ким нарын хэргийг нэгтгэхгүй гэж мэдэгдээд байна.

Шүүх хурлын дараа шүүх бүрэлдэхүүн Юныг цагдан хорихоос суллах өмгөөлөгчдийн хүсэлтийг хянан хэлэлцэж эхэлжээ.

Юн нэгдүгээр сарын дунд үеэс хойш шоронд хоригдож буй. Өмгөөлөгчид түүнийг цагдан хорих нь хууль бус гэж үзэж буйгаа мэдэгдэж, оргон зайлах эрсдэлгүй тул суллахыг хүссэн байна. Үүнтэй прокурорын тал санал нийлэхгүй байгаагаас гадна яллах дүгнэлт нь цагдан хорих хугацаандаа багтсан гэж тайлбарласан байна. Шүүхийн бүрэлдэхүүн өмгөөлөгч, прокурорын талд шаардлагатай бол нэмэлт дүгнэлт гаргах 10 хоногийн хугацаа өгчээ.

Түүнчлэн, шүүхийн гадаа Юны 500 орчим дэмжигч цугларч,  түүнийг суллахыг уриалж жагссан байна. Улмаар цагдаагийн 3200 албан хаагчийг жагсагчдыг хянах зорилгоор шүүхийн гадна байрлуулсан байжээ.