"Эрдэнэс Тавантолгой" ХК-ийн гүйцэтгэх захирлын үүргийг түр орлон гүйцэтгэгч Х.Мөнхжаргал 1072 хувьцааны ногдол ашгийг олгох эсэх талаар мэдээлэл өгөхдөө "Эрдэнэс Тавантолгой" ХК-ийн Төлөөлөн удирдах зөвлөл одоо хуралдах гэж байна. Сая Засгийн газрын хуралдаанд 1072 хувьцааны ногдол ашгийг олгох танилцуулгыг хийлээ. Одоо компанийн ТУЗ хуралдаж, ногдол ашгийн үлдэж байгаа хэсгийг хоёр хувааж олгох шийдвэр гаргах байх. Цагаан сараас өмнө 100 мянган төгрөг, ирэх дөрөвдүгээр сард 100 мянган төгрөгийн ногдол ашгийг олгоно. Манай компанид иргэдэд олгох ногдол ашгийг тараах нөөц боломж бүрэн байгаа. Засгийн газраас ногдол ашгийг хуваах чиглэлийг өгч байна. Үндсэн шийдвэрийг ТУЗ хуралдаж, гаргана.

Нийтдээ 2024 оны ногдол ашиг нь 1072 хувьцаатай нэг иргэнд 350 орчим мянган төгрөг байгаагаас 2024 оны арванхоёрдугаар сард нэг иргэнд 130 мянган төгрөгийг урьчилж өгсөн.

Одоо татвараа хассан дүнгээр 200 мянга орчим төгрөг үлдэж байгаагаа хоёр хувааж олгоно. Нийтдээ 1.1 их наяд төгрөгийг иргэдэд, төртэйгөө нийлээд 3.9 их наяд төгрөгийг ногдол ашигт хуваарилна. Өнгөрсөн 2024 оны цэвэр ашгийн 86 орчим хувийг ногдол ашиг болж тараана. Өнгөрсөн 2024 оны арванхоёрдугаар сарын 31-ний байдлаар 4.5 их наяд төгрөгийн цэвэр ашигтай ажилласан" гэв.

Мөн тэрбээр "Нүүрс экспорт өмнөх оны мөн үеийнхтэй харьцуулахад хэвийн ижил түвшинд гаргаж байна. Харин борлуулалтын үнэ унасантай холбоотойгоор өмнөх оны мөн үеэс 45 хувиар буурсан. Ер нь 2025 оны эхний хагас жилээс хойш нүүрсний үнэ буцаад өсөх хүлээлттэй байна. Он гарснаас хойш манай компани дангаараа 3.3 сая тонн нүүрс экспортолсон" гэсэн юм.