АНУ болон ОХУ-ын төлөөлөгчид украин дахь дайныг зогсоох талаар Саудын Арабд хэлэлцээ хийж буй. Гэхдээ уг хэлэлцээд Европын төлөөлөгчид төдийгүй Украины ерөнхийлөгч Володимир Зеленский уригдаагүй билээ. Хэлэлцээ үргэлжилж байгаа ч уригдаагүй албан тушаалтан, эрх баригчид энэхүү уулзалтыг хүлээн зөвшөөрөхгүй гэж мэдэгдсэн юм.  Хятад улсын хувьд төвийг сахисан байр суурийг хадгалж ирсэн ч ОХУ-ыг дэмждэг гэж ажиглагчид үздэг байна. Тэгвэл энэ удаагийн хэлэлцээний талаар Хятадын Гадаад хэргийн Гуо Жякун ээлжит хэвлэлийн бага хурал дээр хэлэхдээ, Укрианы асуудалд оролцсон бүх талууд нэг ширээний ард суух ёстой гэж мэдэгдэв.

Тодруулбал, "Хятад улс энх тайвны төлөө чиглэсэн бүхий л хүчин чармайлт, тэр дундаа АНУ, ОХУ-ын хоорондын хэлэлцээний талаарх зөвшилцөлд талархаж, дэмжиж байна. Үүний зэрэгцээ, бүхий л холбогдох талууд хэлэлцээрийн үйл явцад цаг тухайд нь оролцохыг манай улсын зүгээс хүсч байна" гэж Гуо Жякун мэдэгдсэн байна.

Хятад улс 2022 оны хоёрдугаар сард эхэлсэн дайнд энх тайвныг зуучлах боломжит байр суурийг эзэлдэг гэж тус улсын эрх баригчид үздэг. Уг байр суурийг эрэлхийлсээр ч ирсэн. Гэвч Бээжин Москватай харилцаагаа гүнзгийрүүлснээр барууны эсэргүүцэлтэй тулгардаг. Одоогийн байдлаар Саудын Арабд цугларсан төлөөлөгчид тодорхой шийдэлд хүрээгүй байгаа ч хэлэлцээний төгсгөлд ямар нэгэн үр дүнг үзүүлнэ гэж ажиглагчид найдаж байна.