АНУ-ын төрийн нарийн бичгийн дарга Марко Рубио Саудын Арабд айлчилж, ОХУ-ын гадаад хэргийн сайд Сергей Лавровтой уулзахаар бэлтгэж байна. Цагаан ордны үзэж буйгаар, энэхүү уулзалт нь Москва дайныг зогсоох хэлэлцээнд нухацтай хандаж буйн илрэл юм. Харин Москвагийн талаас хэлэлцээ хийж АНУ-Оросын харилцааг сэргээхэд гол анхаарлаа хандуулна гэж мэдэгджээ.

Саудын Арабын эх сурвалжийн мэдээлснээр, Украин энэ удаагийн хэлэлцээнд уригдаагүй байна. Улмаар тус улсын ерөнхийлөгч Володимир Зеленский яриа хэлэлцээнээс татгалзаж, Украиныг оруулахгүй бол энхийн хэлэлцээг хүлээн зөвшөөрөхгүй гэж мэдэгдэв. Түүнээс гадна Европын ямар ч өндөр албан тушаалтан оролцохгүй болох нь батлагджээ. Их Британи, Европын холбооны удирдагчид Даваа гаригт Парист яаралтай хэлэлцээ хийсэн бөгөөд тэдний оролцоогүйгээр ямар ч шийдвэр гаргах ёсгүй гэж үзэж буйгаа тодорхой илэрхийлсэн юм.

Нийслэл Эр-Рияд хотод АНУ, ОХУ-ын албаны хүмүүс уулзах бэлтгэл ажил эд өрнөж байна.

Америкийн талаас төрийн нарийн бичгийн дарга Марко Рубио, Трампийн үндэсний аюулгүй байдлын зөвлөх Майк Вальц, Цагаан ордны Ойрхи Дорнод дахь төлөөлөгч Стив Виткофф нар хэлэлцэнэ. Виткофф бол  үл хөдлөх хөрөнгийн тэрбумтан бөгөөд Трампийн дотнын найз юм. Трамп засгийн эрхэнд гарснаас хойш түүнийг олон улсын яриа хэлэлцээний гол хүнээр томилсон байдаг. Түүнчлэн Виткофф энэ сарын эхээр ОХУ-ын ерөнхийлөгч Путинтэй уулзсан юм.

ОХУ-ын төлөөлөгчдийн багт гадаад хэргийн сайд Сергей Лавров, Кремлийн гадаад бодлогын зөвлөх Юрий Ушаков нар багтжээ.

Лавров, Ушаков нар ОХУ-ын гадаад бодлогыг хэрэгжүүлэхэд чухал үүрэг гүйцэтгэдэг өндөр албан тушаалтнууд билээ. Дашрамд дурдахад, Трамп, Путин хоёрын Саудын Арабт болох уулзалтын өмнө энэхүү хэлэлцээ болох гэж байна. Эр-Рияд дахь ОХУ-ын төлөөлөгчдийн бүрэлдэхүүнд тус улсын төрийн баялгийн сангийн тэргүүн Кирилл Дмитриев багтжээ. Тэрбээр АНУ болон ОХУ-ын хоригдол солилцох ажиллагаанд чухал үүрэг гүйцэтгэж байсан удаатай.

Хэлэлцээ эхлэхийн өмнө Кирилл сэтгүүлчдэд хэлэхдээ "Москва АНУ-ын ерөнхийлөгч Дональд Трамп болон түүний багийнхныг асуудал шийдэгч гэж харж байна" гэжээ.

Мөн "Тэд хэд хэдэн том сорилтыг маш хурдан, үр дүнтэй, амжилттай даван туулсан" гэж Кирилл онцолсон юм. Түүний хувьд энэ удаагийн хэлэлцээнд АНУ-ын төлөөлөгчидтэй эдийн засгийн асуудлаар ярилцах юм байна.