Афганистан дахь Талибаны түр засгийн газрын өндөр албан тушаалтнуудын төлөөлөл Япон улсыг зорьсон байна. Тодруулбал, Талибаны эдийн засгийн дэд сайд Латиф Назари олон нийтийн цахим сүлжээнд энэ талаар Бямба гаригт нийтэлсэн юм.Мөн тухайн төлөөлөгчид Ням гаригт Японы нисэх онгоцны буудалд газардана гэж тэрбээр мэдэгджээ.

Талибууд 2021 онд засгийн эрхэнд гарч, түр засгийн газар байгуулсан байдаг. Эл цагаас хойш анх удаа Талибаны төлөөлөгчид Японд айлчлах гэж байна. Афганистан дахь дипломат эх сурвалжийн мэдээлснээр, төлөөлөгчдийг Ниппон сангаас урьсан бөгөөд Японы албаны хүмүүстэй санал бодлоо солилцохоор төлөвлөж байгаа бололтой.

Талибууд олон улсын хамтын нийгэмлэгийн хүчирхэг, идэвхтэй гишүүн болохын тулд дэлхийтэй нэр төртэй хамтран ажиллахыг эрмэлзэж байна гэж Назари олон нийтийн сүлжээнд мэдэгдсэн байна. Гэсэн хэдий ч Талибаны удирдлага эмэгтэйчүүдийн сурч боловсрох, хөдөлмөр эрхлэх эрхийг хязгаарладаг гэж олон улсын нийгэмлэгүүд шүүмжилдэг. Тиймээс аль ч улс орон уг түр засгийн газрыг хууль ёсных гэж хүлээн зөвшөөрөөгүй байгаа юм.

Барууны тавьсан хориг арга хэмжээний улмаас Афганистаны эдийн засаг хүнд байдалд орсоор байна. Түр засгийн газар энэхүү айлчлалынхаа хүрээнд Японоос илүү их тусламж, хөрөнгө оруулалт авна гэж найдаж байгаа бололтой гэж ажиглагчид үзэж байна.