Халх Нөмрөгийн Буриад хошууны 100 жил, Дорнод аймгийн Хөдөлмөрийн гавьяаны улаан тугийн одонт Цагаан-Овоо сумын 90 жилийн ойд зориулсан Улсын начин Дондогийн Цогзолдоржийн нэрэмжит Улс, аймаг, цэргийн алдар цолтой хүчит 128 бөхийн барилдаанд ЗХ-189 ангийн улсын начин Лхагвасүрэнгийн Энхсаруул түрүүлж, улсын начин Бямбадоржийн Түвшинтөгс үзүүрлэжээ.
Нэрэмжит барилдаанаа зохион байгуулж буй МҮБХ-ны тэргүүлэгч, улсын ахлах цэц, Монгол улсын начин Д.Цогзолдоржид МҮБХ болон гэр бүл, ахан дүүс, найз нөхөд, нутгийн зон олон, нэгэн үед барилдаж явсан бөхчүүд, шавь нар зэрэг олон хүмүүс барилдаанд оролцогчдод хүндэтгэл үзүүлж байлаа.

Тус барилдааны түрүү бөх 8 сая, үзүүр бөх 5 сая, дөрөвт үлдсэн бөх тус бүр 2 сая төгрөгийн бай шагнал гардан авсан байна.

Дараагийн барилдаан хоёрдугаар сарын 20-нд Сар шинийн цуврал барилдааны эхнийх болох Өсвөр бөхийн барилдаанаар үргэлжилнэ.

Түүнчлэн, МҮБХ-ны  шинэ хэлбэрийн барилдаан болох “Алтан базер” сугалаат барилдаан энэ оны гурав ба аравдугаар сард зохион байгуулагдах болжээ. Энэхүү барилдааныг МҮБХ-той хамтран “Тэнүүн Энтертаймент” ХХК зохион байгуулах бөгөөд МҮБХ-ны ЕНБДарга Т.Түмэндэмбэрэл, менежер С.Гантөр нартай тус компанийн Гүйцэтгэх захирал Б.Эрдэнэсайхан хамтран ажиллах гэрээг байгуулсан байна.