Энэ онд Москва 15 шинэ дивиз байгуулахаар төлөвлөж байгаа бөгөөд үүнд 150 мянган цэргийн албан хаагч багтсан гэж Украины ерөнхийлөгч Володимир Зеленский Бямба гаригт Мюнхений аюулгүй байдлын бага хурлын үеэр мэдэгджээ. Тэрбээр мөн Орос улс долоо хоног бүр шинэ цэрэг элсүүлэх төвүүдийг нээж байна гэж онцолсон байна.

Аюулгүй байдлын бага хурлын индэр дээрээс хэлсэн үгсээс нь дурдвал, “Путин үүнийг төлж чадна. Газрын тосны үнэ дэлхийг үл тоомсорлоход хангалттай өндөр хэвээр байна. Энэ зун Орос улс сургалт, сургуулилт нэрийн дор цэргээ Беларусь руу илгээхээр төлөвлөж байгаа талаар бид тодорхой мэдээлэл авсан. Гурван жилийн өмнө Украиныг түрэмгийлхээсээ өмнө тэд яг ийм байдлаар хүчээ нэгтгэсэн юм. Беларусь дахь Оросын энэ хүчин Украин руу довтлох зорилготой гэж уу? Магадгүй. Эсвэл үгүй ​​ч байж магад. Эсвэл энэ нь танд зориулагдсан юм болов уу" гэж Зеленский хэлжээ.

Беларусь НАТО-гийн гурван оронтой хиллэдэг бөгөөд энэ нь Оросын цэргийн ажиллагааны түшиц газар болсон гэж ажиглагчид үздэг.

Зеленский хэлэхдээ, “Путин, Лукашенко хоёрын хэлснээр Беларусь одоо хориотой зэвсэг буюу дунд тусгалын пуужин, тэр байтугай цөмийн зэвсгийг эзэмшиж байна. Путин одоо Беларусийг Оросын өөр нэг муж гэж харж байгаа нь тодорхой. Мөн бид бодитой байх хэрэгтэй. Хэрэв хэн нэгэн цэргийн хөөргөх тавцан байгуулж байгаа бол бид энэ талаар юу хийх ёстой вэ? Хамгийн чухал анхаарах зүйл нь дараагийн дайралт.  Дараагийн дайралтаас өмнө бид юу хийж чадах вэ?“ гэжээ.

Европт эмх замбараагүй байдал үүсгэх зорилгоор Оросын тагнуулын алба цагаачдын хямралыг Польш, Литвийн хил дээр аль хэдийн өдөөн хатгасан гэж тэрбээр онцлон тэмдэглэсэн байна. Тодруулбал, "Гэхдээ дараагийн удаа цагаачид биш бол яах вэ? Хэрэв Оросын цэргүүд байвал яах вэ? Эсвэл Хойд Солонгосын цэргүүд үү? Бүү андуураарай, хойд солонгосчууд сул дорой биш. Тэд одоо хэрхэн тулалдах, орчин үеийн дайнтай хэрхэн тэмцэх талаар суралцаж байна. Танай армиуд яах вэ? Тэд бэлэн үү? Хэрэв Орос улс 2014 онд Крымыг эзлэн авсан шиг Беларусийн нөмөр дор ямар ч таних тэмдэггүй хуурамч ажиллагаа явуулбал манай холбоотнууд хэр хурдан хариу үйлдэл үзүүлэх вэ? Ер нь хариу арга хэмжээ авах болов уу?" гэж холбоотон орнууддаа дайнд үзүүлэх нөлөөгөө нэмэх шаардлагатай гэж уриалсан байна. Тэрбээр мөн АНУ болон Мюнхений харилцаа дуусч магадгүйг дурдаж "Одооноос эхлэн бүх зүйл өөр байх болно, Европ үүнд дасан зохицох хэрэгтэй" гэжээ.