Израиль болон АНУ-ын зүгээс 15 сар үргэлжилсэн цуст дайны улмаас сүйрсэн Газад зэвсэгт Хамас бүлэглэл оршин тогтнохыг хүлээн зөвшөөрдөггүй билээ. Гэсэн хэдий ч палестинчуудад нэгдсэн газар нутгаа эзэмших эрхийг олгохыг Египет онцолдог. Өнгөрсөн хугацаанд Газын зурваст гал зогсоох хэлэлцээр байгуулагдаж, Хамас болон Израиль хоригдол солилцоогоо эхлүүлсэн ч хэд хэдэн зөрчилдөөн гарсан юм. Улмаар гал зогсоох хэлэлцээр Трамп, Нетаньяху нарын уулзалтын дараа талаар болж магадгүй гэж олон улсын ажиглагчид эмээж байв.

Тэгвэл Египетийн эх сурвалжийн мэдээлснээр, гал зогсоох хэлэлцээрийн гурван үе шатыг үргэлжлүүлэн хэрэгжүүлэх амлалтаа Хамас баталсан байна.

Мөн Египетийн эрх баригчид Газын зурваст тусламж үзүүлэх, сэргээн босгох ажилд хяналт тавих түр хороо байгуулах хүчин чармайлтаа эрчимжүүлэх болсноо мэдэгдсэн байна. Одоогийн байдлаар нэгдүгээр сарын 19-нөөс эхлэн хэрэгжиж эхэлсэн гал зогсоох хэлэлцээрийн нэгдүгээр шатны дагуу Израилийн дөрөв дэх палестин хоригдлын бүлэг суллагдсан байна.

Египет нь Хамас болон Израилийн хооронд гол зуучлагчийн үүрэг гүйцэтгэж, 2023 оны аравдугаар сарын 7-ноос хойш гал зогсоох хэлэлцээрийн үйл явцыг хянаж, оролцож байна. Газын зурваст болсон дайнд 48 мянга гаруй палестин амиа алдаж, 110 мянга гаруй хүн шархадсаны ихэнх нь эмэгтэйчүүд, хүүхдүүд байв.