Монгол Улсын 2025 оны төсвийн хуульд тодотгол хийхээс аргагүй нөхцөл байдал үүссэнийг УИХ-ын гишүүд сануулах болсон. Тэгвэл Үндэсний статистикийн хорооноос гаргасан мэдээгээр энэ оны нэгдүгээр сарын урьдчилсан гүйцэтгэлээр улсын нэгдсэн төсвийн нийт орлого, тусламжийн хэмжээ 1.7 их наяд төгрөг байгаа нь өмнөх оны мөн үеэс 36.7 хувь буюу 1 их наяд төгрөгөөр буурчээ. Харин тэнцвэрүүлсэн орлого, тусламжийн хэмжээ 1.7 их наяд төгрөгт хүрч өмнөх оны мөн үеэс 38.9 хувиар буурсан байна.

Нийт зарлага эргэж төлөгдөх цэвэр зээлийн хэмжээ 2025 оны нэгдүгээр сард 2.2 их наяд төгрөгт хүрч, тэнцвэржүүлсэн тэнцэл 492.7 тэрбум төгрөгийн алдагдалтай гарсан аж.

Нүүрсний үнэ унасаар байгаа бөгөөд Монголын хөрөнгийн биржээр дамжуулан нүүрс арилжаалдаг үйл явц саараад буй. Учир нь худалдан авагч орж ирэхгүй болсон. Иймээс ойрын үед нүүрсний үнэ сэргэнэ гэж найдахад хүнд байгаа юм.

Монгол Улсын экспортын дийлэнх хувийг нүүрсний экспорт эзэлдэг. Нүүрсний үнэ унаж, экспорт саарснаар валютын орж ирэх урсгал саарахын зэрэгцээ нөөцөд ч асуудал үүсгэж ханшид нөлөөлж эхэлсэн. Нөгөө талдаа нүүрсний орлогоор төрийн албан хаагчдын цалин, ахмад настнуудын тэтгэвэр, халамж, хүүхдийн мөнгө зэргийг зохицуулж ирсэн. Иймээс УИХ –ын хаврын чуулганаар нэн тэргүүнд хэлэлцэх асуудлын нэг нь Монгол Улсын 2025 оны төсвийн тодотгол болж орж ирэхээр байгааг эдийн засагчид ч сануулж байна.

Одоогоор энэ талаар Засгийн газрын зүгээс байр суурь илэрхийлээгүй байгаа юм. УИХ-аар Монгол Улсын 2025 оны төсвийн тодотголыг хэлэлцэх нөхцөлд Засгийн газар 2025 оны төсвийн хуулийг тодотгох хуулийн төслийг боловсруулж, УИХ-д өргөн мэдүүлэх учиртай.