Чернобылийн цөмийн реакторын хамгаалалтын бамбай Оросын нисгэгчгүй нисэх онгоцны цохилтод өртсөнийг Украины ерөнхийлөгч Зеленский мэдэгдлээ. Баасан гаригийн өглөөний байдлаар Чернобылийн дотор болон гаднах цацрагийн түвшин хэвийн, тогтвортой байгааг НҮБ-ын цөмийн хяналтын байгууллагын мэдээлэв.

Харин ОХУ энэ мэдээллийг үгүйсгэж байна.

Дэлхий даяарх цөмийн аюулгүй байдлыг хянадаг Олон улсын атомын энергийн агентлаг халдлагад хэдхэн минутын дотор хариу өгчээ. Мөн тус агентлаг өндөржүүлсэн бэлэн байдалд байна.

Чернобылийн атомын цахилгаан станц 1986 онд дэлбэрснээр цацраг идэвхт бодис агаарт тархаж, Европ даяар нийгмийн эрүүл мэндэд аюул заналхийлсэн. Цөмийн реактор дэлбэрэлтээс болж дээвэргүй болсон учир бетон болон гангаар аварга том хамгаалалтын бамбай хийсэн. Гэвч энэ бамбай гэмтсэнийг харуулах дүрс бичлэгийг Зеленский "Х" хуудсандаа нийтэлжээ.

Бамбай нь дараагийн зуунд цацраг идэвхт бодис алдагдахаас сэргийлэх зорилготой. Энэ нь 275 метр өргөн, 108 метр өндөр бөгөөд 1.6 тэрбум ам.долларын хөрөнгөөр босч байв. Гэсэн ч үүнийг анх бүтээхдээ гадны нисгэгчгүй онгоцны дайралтыг тэсвэрлэж үлдэнэ гэж тооцоолж бүтээгээгүйг мэргэжилтнүүд хэлж байна.