Өмхий үнэрээрээ алдартай дуриан жимс олон зууны турш хүндэтгэл болон доромжлолын бай болсоор иржээ. Тийм ч учраас дэлхийн хамгийн эрс тэс жимс гэж нэрлэх нь ч бий. Зүүн өмнөд Азид жимсний хаан гэж нэрлэгддэг дурианыг нийтийн тээвэр, зочид буудалд авч орох зэрэг нь хэд хэдэн улсад хориотой байдаг. Яагаад гэвэл тус жимсийг ялзарсан сонгино, угаагаагүй оймсны үнэртэй гэж дургүйлхэх хүн олон. Алдарт тогооч Энтони Бурдейн хүртэл дуриан идэж үзчихээд "Нас барсан эмээгээ үнсэхтэй адил байна" гэж хэлсэн байдаг.

Хэдийгээр эрс тэс шинж чанартай ч дуриан жимс Зүүн өмнөд Азийн соёлд онцгой байр суурь эзэлдэг. Тэгвэл энгийн нэг жимс, соёлын илэрхийллээс халиад дуриан жимс дипломат харилцааны бэлгэ тэмдэг болжээ.

Тодруулбал, Малайзын Элчин сайдын яам Лхагва гаригт Сөүл хотноо “Дурианы дипломат ажиллагаа” арга хэмжээг анх удаа зохион байгууллаа. Энэ нь дурианы өвөрмөц шинж чанарыг ашиглан экспортыг нэмэгдүүлэх, соёлын дипломат харилцааг дэмжих зорилготой.

Малайзаас Солонгос улсад суугаа Элчин сайд Мохд Замруни Халид үг хэлэхдээ "Дуриан жимс малайз хүмүүсийн сэтгэлд онцгой байр суурь эзэлдэг. Бид Өмнөд Солонгост дуриан жимсийг нутагшуулснаар Малайзын хөдөө аж ахуйг сурталчлаад зогсохгүй хүнсний технологи, аялал жуулчлал, тогтвортой хөгжил зэрэг салбарт хамтран ажиллах боломжийг бүрдүүлж байна. Энэ санаачлага нь харилцан ойлголцлыг бэхжүүлэх, худалдааны шинэ боломжуудыг бий болгох, Малайз, БНСУ-ын соёлын солилцоог гүнзгийрүүлэх зорилготой" гэжээ.

Өвөрмөц үнэр, амттай ч гэлээ дуриан жимсний экспорт дэлхийн олон оронд гайхалтай өндөр үзүүлэлттэй байгааг энэ үеэр онцолжээ. Тухайлбал, Малайз, Тайланд, Вьетнам, Филиппин зэрэг гол үйлдвэрлэгч орнуудаас Хятад руу хийсэн экспортын хэмжээ 2024 онд 1.56 тэрбум кг хүрчээ. Энэ нь долоон тэрбум ам.доллараар үнэлэгдэнэ.