Энэтхэгийн ерөнхий сайд Нарендра Моди Вашингтонд хоёр өдрийн хугацаатай айлчилж байна. Айлчлалын хүрээнд тэрбээр ерөнхийлөгч Дональд Трамптай уулзсан ба энэ үеэр АНУ-ын газрын тос, байгалийн хийн импортыг нэмэгдүүлэх тохиролцоонд хүрчээ. Энэ нь хоёр орны худалдааны алдагдлыг бууруулна гэж үзэж байна.

Трамп энэ талаар хэлэхдээ "Тэд манай газрын тос, байгалийн хийг их хэмжээгээр худалдаж авах болно. Тэдэнд хэрэгтэй, бидэнд байгаа" гэжээ. Харин Моди Энэтхэгийн эрчим хүчний аюулгүй байдлыг хангахын тулд бид газрын тос, байгалийн хийн худалдаанд анхаарлаа хандуулах болно. Мөн цөмийн эрчим хүчний салбарт илүү их хөрөнгө оруулна" гэв.

АНУ, Энэтхэг улсуудын хооронд худалдааны маргаан байдаг ч гэлээ Трамп, Моди нар олон жилийн турш хувийн сайхан харилцаатай.

Мөн АНУ-аас Энэтхэгт цэргийн техник хэрэгслийн борлуулалтаа олон сая ам.доллараар нэмэгдүүлж байгааг Пүрэв гаригт зарлав. Энэ хүрээнд "F-35" сөнөөгч онгоцыг Энэтхэгт нийлүүлэх болжээ.

Энэтхэгийн газрын тосны импортыг ихэвчлэн Саудын Араб, Ирак, Арабын нэгдсэн Эмират, Кувейт зэрэг орнууд бүрдүүлдэг. Харин байгалийн хийн хамгийн том нийлүүлэгч нь Катар. Сүүлийн үед Энэтхэг эрчим хүчний хангамжаа төрөлжүүлэх бодлого барьж, ОХУ-аас газрын тосны хямд нийлүүлэлт авах болсон. Тэгвэл энэ удаад АНУ-аас газрын тос, байгалийн хийгээ их хэмжээгээр худалдан авах тохиролцоонд ийнхүү хүрчээ.

Трамп энэ уулзалтын өмнөхөн дэлхийн өнцөг булан бүрт байгаа худалдааны түншүүддээ өргөн хэмжээний шинэ тариф тооцохыг тушааж, дөрөвдүгээр сарын 1-нээс мөрдөж эхлэхийг зөвлөхүүдээ сануулсан. Үүнийгээ Трамп "Бидний холбоотнууд дайснуудаас долоон дор. Тогтолцоо маш шударга бус байсан. Бүгд л АНУ-ын давуу талыг ашигласан" гэж хэлжээ.