Солонгосын дайны улмаас салж хагацсан гэр бүлүүдийг уулзуулдаг төв Хойд Солонгосын хилийн Гемганг ууланд байрладаг байв. Гэвч Өмнөдийн засгийн газрын хөрөнгөөр барьсан уг төвийн барилгыг Хойд Солонгос нурааж буйг Сөүлийн Нэгдлийн яам өнөөдөр мэдэгдлээ.

Яамны хэвлэлийн төлөөлөгч Ку Бён Сам хэлэхдээ “Гемганг уулын аялал жуулчлалын бүсэд хоёр Солонгосын хэлэлцээрийн хүрээнд баригдсан төвийг нурааж байгаад бид гүнээ харамсаж байна. Энэ ажиллагаагаа нэн даруй зогсоохыг Хойд Солонгосоос шаардаж байна. Энэ бол салж хагацсан гэр бүлүүдийн чин сэтгэлийн хүслийг үл тоомсорлож буй хүний үнэргүй үйлдэл” гэжээ.

Салж хагацсан гэр бүлийн гишүүдийг уулзуулах албан ёсны арга хэмжээг засгийн газар зохион байгуулдаг. Уг уулзалтад оролцохоор Өмнөд Солонгосын 134 мянга гаруй иргэн эртнээс бүртгүүлсэн байсан. Гэвч арванхоёрдугаар сарын байдлаар тэднээс ердөө 37 мянга орчим нь л амьд үлдсэн байна.

Тус уулзалтын төв нь 12 давхар барилгад байрлах ба уулзалт зохион байгуулах зориулалттай 206 өрөө болон хүлээн авалтын танхимтай. Тус төвд 2009 оны есдүгээр сар, 2010 оны аравдугаар сар, 2014 оны хоёрдугаар сар, 2015 оны аравдугаар сар, 2018 оны наймдугаар сард гээд нийт таван удаа гэр бүлийн уулзалт болж байжээ.

Гэвч 2019 онд Ханойд болсон АНУ, Хойд Солонгосын дээд хэмжээний уулзалт амжилтгүй болсноор тус барилга үндсэндээ хаягдсан гэхэд болно.

Байгууламжийг барихад 55 тэрбум вон буюу 38 сая ам.доллар зарцуулсан аж.

Хойд Солонгос улс сүүлийн үед хоёр Солонгосын нэгдлийн бэлгэ тэмдэг болсон хэд хэдэн барилга байгууламжийг нураасан. Тухайлбал, өнгөрсөн оны тавдугаар сард Өмнөд Солонгосын засгийн газрын мөнгөөр ​​баригдсан гал сөнөөх станцыг нураажээ.