Канадын муж, нутаг дэвсгэрийн удирдагчид АНУ-д айлчилж, Цагаан ордонд ерөнхийлөгч Дональд Трампийн татварын нэмэгдэл тарифын талаар уулзалт хийжээ. Тодруулбал, 13 муж, нутаг дэвсгэрийн тэргүүн нар худалдааны дайн Канад улсын зүгээс хэрхэн харагдаж буй талаар хэлэлцсэн байна. АНУ-ын ерөнхийлөгч хоёрдугаар сарын 1-нээс эхлэн Канадын эрчим хүчинд 10 хувь, бусад бүх импортын бараанд 25 хувийн татвар ногдуулах болсон ч уг шийдвэрээ эргүүлэн харж, 30 хоног түр хойшлуулах болсон байдаг.

Үүнээс гадна, Даваа гаригт тэрбээр дэлхийн бүхий л орноос ирэх ган, хөнгөн цагааны импортод 25 хувийн татварын нэмэгдэл ногдуулах болсноо зарласан. Энэ нь гуравдугаар сарын 12-нд хэрэгжиж эхэлнэ гэж төлөвлөгдөж байна.

Канадын удирдагчид Лхагва гаригт АНУ-ын хууль тогтоогчидтой уулзаж, сүүлийн мөчид Трампийн ахлан зөвлөхтэй уулзжээ. Онтариогийн удирдагч Даг Форд хэлэхдээ "Уулзалт маш үр дүнтэй, бүтээмжтэй болсон" гэсэн юм. Британийн Колумбийн удирдагч Дэвид Эби хэлэхдээ "Цагаан ордны зөвлөхүүд хилийн аюулгүй байдлын улмаас тариф тогтоосон болон АНУ-ын зүгээс худалдааны дайнд давуу байдал гаргах хүсэлгүй байгаа гэдгийг тайлбарлаж, Трампийн үгэнд орохыг бидэнд уриалсан" гэж уулзалтын талаар хэлсэн байна. Мөн "Ширээний ард илэн далангүй чухал мөчүүд өнгөрсөн" гэж хэлсэн байна.