УИХ-ын гишүүн, Сангийн сайд Б.Жавхлан Япон улсын Токио хотноо болж буй Олон улсын валютын сан, Японы олон улсын хамтын ажиллагааны агентлагийн хамтарсан 7 дахь удаагийн уулзалтад оролцлоо. Энэ жилийн уулзалт “Хөгжиж буй Азийн бүс нутгийн эдийн засаг, төсвийн бодлого тодорхойлогчдын нийгэм, эдийн засгийн хүрээнд цаг үеийн чухал асуудлууд болон хэтийн төлөв” сэдвийн хүрээнд болов.

Ази, Номхон далайн бүс нутгийн улс орнуудын Сангийн сайд нар, Төв банкны ерөнхийлөгчид, Олон улсын валютын сангийн удирдлагууд, Японы Олон улсын хамтын ажиллагааны байгууллагын удирдлагууд оролцож, эдийн засгийн цаг үеийн чухал асуудлуудын талаар санал солилцох зорилготойгоор хоёр жилд нэг удаа ийнхүү чуулдаг. Энэ удаагийн 7 дахь хамтарсан хуралдаанаар “Хөгжиж буй Азийн бүс нутгийн эдийн засгийн өсөлтийг хангах дараагийн бодлогын алхам”, “Ази, Номхон далайн бүс нутгийн уур амьсгалын өөрчлөлтөд дасан зохицох болон Ази, Номхон далайн бүс нутгийн аж үйлдвэрийн бодлого” гэсэн сэдвийн хүрээнд хэлэлцүүлэг өрнүүлж санал солилцов.

Сангийн сайд Б.Жавхлан тус хуралд оролцох үеэр “Хөгжиж буй Азийн бүс нутгийн эдийн засаг, төсвийн бодлого тодорхойлогчдын дараагийн алхам” сэдэвт хэлэлцүүлэгт оролцож, Монгол Улсын нийгэм, эдийн засгийн өнөөгийн нөхцөл байдал, цаашдын алхам, хэрэгжүүлж буй бодлого, арга хэмжээний талаар илтгэл тавилаа. Тэрбээр, Монгол Улсын аж үйлдвэрийн бодлого нь Ази, Номхон далайн эдийн засгийн тэргүүлэх чиглэлүүдийн уялдааг хангахыг зорьж байна. Монгол Улсын эдийн засгийг тэлэх, урт хугацааны өсөлтийг хангах зэрэг зорилт бүхий 14 мега төслийг хэрэгжүүлэхээр төлөвлөсөн. Эдгээр төслүүд нь дэд бүтцийг сайжруулах, сэргээгдэх эрчим хүчний станц болон зэс, ган, газрын тосны бүтээгдэхүүн боловсруулах үйлдвэрүүд байгуулах зэрэг аж үйлдвэрийн хөгжлийг шинэ шатанд гаргах болно гэдгийг онцлов.

Мөн бусад орны илтгэгчид, аж үйлдвэрийн бодлогын урт хугацааны тогтвортой байдлыг хадгалахын тулд бүтцийн шинэчлэлийг хийх нь зүйтэй. Түүнээс гадна гадаад, дотоодын хөрөнгө оруулалтыг нэмэгдүүлэх, хувийн хэвшлийнхний өрсөлдөөнийг дэмжих нь чухал гэх зэрэг саналуудыг илэрхийлж байлаа.