АНУ-ын ерөнхийлөгч Дональд Трамп Лхагва гарагт Владимир Путинтэй утсаар ярьжээ. Тэд удаан ярилцсаны эцэст үр дүнтэй шийдэлд хүрч, энхийн хэлэлцээг удахгүй эхлүүлэхээр тохирсон байна. Мөн тэд хоёр биенээ тус тусынхаа нийслэлд айлчлахыг урьжээ.

Тэдний нүүр тулан уулзах өдөр хараахан товлогдоогүй ч Саудын Арабт уулзах төлөвтэй байна.

Украины Ерөнхийлөгч Владимир Зеленский ч үүний дараахан Трамптай урт хугацаанд үргэлжлэх энх тайвны талаар ярилцсан гэж мэдэгдсэн юм. Тэрбээр Баасан гаригт Мюнхенд болох Украины батлан хамгаалахын дээд хэмжээний уулзалтын үеэр АНУ-ын дэд ерөнхийлөгч Ж.Д.Вэнс, Төрийн нарийн бичгийн дарга Марко Рубио нартай уулзах аж.

Дайн зогсоох талаар Трамп цахим хуудсандаа “Хэрээс хэтэрсэн, хэнд ч хэрэггүй, үхэл, сүйрэл болсон энэ хөгийн дайныг зогсоох цаг нь болсон. Орос, Украины ард түмнийг бурхан ивээг” гэжээ.

Хамтран ажиллах цаг нь болсон гэсэн Трампийн санааг Путин дэмжиж байгааг Кремлийн хэвлэлийн төлөөлөгч Дмитрий Песков мэдэгдэв.

Трампийн хэлснээр Украин 2014 оноос өмнөх хил рүүгээ буцах магадлал багатай аж. Гэхдээ тухайн үеийн газрын зарим хэсэг нь буцаж ирнэ гэжээ. Мөн Украин НАТО-д элсэх магадлал бага гэж Батлан хамгаалахын сайд Пит Хегсэттийн хэлсэнтэй санал нэг байгаагаа Трамп мэдэгдэв. Энэ мэдэгдэл Украины хувьд хүндхэн цохилт болно гэж үзэж байна. АНУ-ын шинэ засаг захиргаа  Байдены үеийг бодвол Украинд энэрэнгүй хандах нь багассан тул Хегсэттийн хэлсэн үг Москвад таалагдах нь дамжиггүй.

Зеленский Мягмар гаригт хэвлэлд ярилцлага өгөхдөө Украин дахь Оросын эзэмшилд байгаа газар нутгийг энхийн хэлэлцээрийн хүрээнд Курск муж дахь Украины эзэмшилд байгаа газар нутгаар сольж болно гэжээ. Гэвч Дмитрий Песков үүнийг боломжгүй гэж мэдэгдсэн юм. Тэрбээр “ОХУ газар нутгаа солилцох талаар хэзээ ч ярилцаж байгаагүй, хэлэлцэхгүй. Украины анги нэгтгэлүүдийг энэ нутаг дэвсгэрээс гаргана" гэжээ.