Сар шинийн баяр дөхсөн энэ өдрүүдэд айлуудын хонины ууц, үхрийн өвчүү хулгайлах хэрэг бүртгэгдэж байгаа талаар цагдаагийн байгууллагаас мэдээллээ. Иргэдийн бэлтгэн чанасан хонины ууц, утсан үхрийн өвчүү, хөлдөөсөн буузыг хулгайлах тохиолдол гарч байгааг анхааруулж байна.

Тухайлбал, 2025 оны хоёрдугаар сарын 4-ний өдөр Булган аймгийн нутаг дэвсгэрт “Зуслангийн байшинд хулгайч орж, хоёр ширхэг өвчүү,  үхрийн мах алдагдсан байна” гэх дуудлага мэдээлэл өгсөн бол нийслэлд хоёрдугаар сарын 7-ны өдөр “Сонгинохайрхан дүүргийн нутаг дэвсгэрт байрлах зуслангийн байшинд хулгайч орсон байна” гэх мэдээллийг авч шалгахад нэг ширхэг хонины ууц, хоёр ширхэг мөнгө аяга алдагдсан хэргийг тус тус шалгаж байна.

Иймд иргэд Та бүхэн сар шинийн баяртаа зориулан бэлтгэсэн хүнс, эд зүйлсээ хадгалахдаа цоож түгжээг сайтар бэхлэх, сонор сэрэмжтэй байж энэ төрлийн гэмт хэргээс урьдчилан сэргийлээрэй.