Нүглээс ангижирахыг хүссэн 10 сая гаруй сүсэг бишрэлтэй хинду шашинтнууд өнөөдөр /2025.02.12/ Энэтхэгийн хойд хэсэгт дөрвөн цагийн турш ариун усанд шумбав. Уттар Прадеш мужийн Праяграж хотод болсон энэ үйл ажиллагааг дэлхийн хүн төрөлхтний хамгийн том цугларалт гэдэг бөгөөд хинду шашны баярын хамгийн ариун өдрүүдийн нэгд тооцогддог. Эрх баригчид энэ өдөр олон нийтийн дунд эмх замбараагүй байдал үүсэхээс сэргийлж цагдаагийн ажилтнуудын тоог нэмэгдүүлжээ. Мөн түргэн тусламж үзүүлэх машинуудыг бэлэн байдалд оруулсан байна.

Өглөөний 08:00 цаг гэхэд 10 сая гаруй хүн ариун усанд оржээ.

Мужийн цагдаагийн газрын дарга Прашант Кумарын хэлснээр хүний тоо минут тутамд нэмэгдсэн аж. Улмаар нэг өдрийн дотор хэд хэдэн улсын хүн амаас ч илүү гарсан олон хүн цуглажээ. Иймд мужийн дэд бүтцийн зохицуулалтад хүндрэл үүсч, замын түгжрэл ч ихэссэн байна.

Нэгдүгээр сарын 29-нд болсон шашны арга хэмжээний үеэр 30 гаруй хүн амиа алдсан. Тухайн үед 76 сая гаруй хүн ариун усанд орохоор цуглажээ. Тэдний дунд Энэтхэгийн ерөнхийлөгчөөс эхлээд сайд нар, кино одууд, баячууд гээд нийгмийн бүх л төлөөлөл байжээ.