Владивосток дахь Өмнөд Солонгосын Ерөнхий консулын газрын даргаар ажиллаж байсан дипломатч Даваа гаригт ОХУ-ын Сахалин дахь нэгэн номын санд бэлэг илгээжээ. Энэ нь дэлхийн бөмбөрцөг байсан боловч Орост эзлэгдсэн бүс нутгуудыг Украины нутаг дэвсгэрт оруулан тэмдэглэсэн байжээ. Тэгвэл тус номын сангийн ахлах номын санч энэ тааламжгүй бэлгийг буцаана гэж мэдэгдлээ. Тасс агентлагт мэдээлснээр, тус номын санч хэлэхдээ "Дипломатч хүн ийм гажигтай бэлэг илгээсэн нь ухаангүй үйлдэл. Ийм зүйл илгээснээрээ салан тусгаарлах үзлийг дэмжигч гэж харагдана гэдгээ үл тоомсорлож байна" гэжээ.

Тэгвэл Өмнөд Солонгосын Гадаад хэргийн яам үүнд тайлбар өгчээ. Ингэхдээ тус газрын зургийг олон улсын стандартад нийцүүлэн хийсэн гэж мэдэгдсэн байна.

Түүнчлэн "Энэ бөмбөрцөгийг олон улсын байгууллага, газрын зураг хэвлэгч томоохон компаниудын зураг зүйн туршлага, стандартад үндэслэн үйлдвэрлэсэн. Мөн Өмнөд Солонгосын засгийн газар Зүүн тэнгис гэсэн нэрийг ашиглахыг дэмжиж энэ бөмбөрцөгийг ашиглаж байгаа. Цаашид Зүүн тэнгис нэрийг сурталчлахдаа илүү болгоомжтой хандах болно" гэжээ.

Зүүн тэнгис гэсэн нэршилийг дэмжинэ гэдэг нь Өмнөд Солонгосын засгийн газар газрын зураг болон олон улсын хэлэлцүүлэгт Япон тэнгис гэх нэршилийг ашиглахгүй гэсэн үг юм.

Херсон, Запорожье, Луганск, Донецк гэсэн дөрвөн бүс нутгийг Москва хяналтдаа авсан ч тэдгээрийг албан ёсоор Оросын нутаг гэж олон улсын хамтын нийгэмлэг, тэр дундаа АНУ, Европ хүлээн зөвшөөрдөггүй. Өмнөд Солонгос ч мөн ийм байр суурийг илэрхийлсэн нь энэ бололтой.