Сайжруулсан түлшинд хордон амиа алдсан зургаан иргэн болон О.Одбаяр хүүтэй холбоотой хувийн эмзэг мэдээлэл олон нийтийн сүлжээнд цацагдсан нь Хувь хүний мэдээллийг нууцлах үүргээ төр биелүүлж чадаагүй гэх асуудал хөндөхөд хүргэсэн юм.

Тэгвэл Хууль зүй дотоод хэргийн сайд О.Алтангэрэлийн ярьснаар бол дээрх хувь хүний нууцтай холбогдох эмзэг мэдээлэл нь Шуурхай штабын чатнаас алдагдсан болж таараад байна.

Энэ талаар Хууль зүй дотоод хэргийн сайд О.Алтангэрэл “Нийслэлийн агаарын бохирдлыг бууруулах шуурхай штаб ажиллаж байна. Энэ хүрээнд Байгаль орчин уур амьсгалын өөрчлөлтийн яам, Хууль зүй, дотоод хэргийн яам, Эрчим хүчний яам мөн нийслэлийн холбогдох газрын ажилтнан, мэргэжилтнүүд ажлын хэсэг болоод ажиллаж байна.

Эдгээр хүмүүс дундаа мэдээлэл солилцдог вайбэр групптэй. Хариуцаж байгаа ажилтай нь холбоотой нөхцөл байдлын талаар мэдээллийг шуурхай солилцдог энэ вайбер группт байгууллагуудын тавьсан мэдээллийг олж авч, олон нийтэд тараасан нь урьдчилсан байдлаар тогтоогдсон.

Тухайлбал үзлэг, шалгалт хийсэн, утаа мэдрэгч суурилуулсан зэрэг нь цагдаагийн байгууллагаас өгсөн мэдээлэл. Энэ мэтчилэн тал талаас өгсөн мэдээллийг цуглуулан, нийлүүлж бэлдсэн байна. Урьдчилсан байдлаар иргэн Б-г, бусад дөрвөн хүний хамт шалгаж байна. Шалгаж буй хүн нь төрийн албаны харьяалалгүй" гэсэн юм.

Улаанбаатар хотын агаарын бохирдлыг бууруулах шаардлагыг иргэд тавьж, энэ оны анхны жагсаал Сүхбаатарын талбайд болохтой зэрэгцэн Ерөнхий сайдын дэргэд Нийслэл Улаанбаатар хотын агаарын бохирдлыг бууруулах шуурхай штабыг байгуулсан.  Шуурхай штаб нь долоо хоног бүрийн Бямба гаригт хуралддаг болсон билээ.

Гэвч хувь хүний нууцтай холбоотой эмзэг мэдээлэл Шуурхай штабын вайбэр группээс алдагдсан болж таараад байна.

Г.ХОРОЛ