Түгжрэлийг сааруулах хүрээнд нийслэлээс орон сууцны хороолол дундах авто замын нэгдүгээр эгнээг тусгаарлах хайс шинээр байрлуулах болсон. Тусгаарлах зориулалттай цагаан хайс 3.5 метр урттай бөгөөд сууриар нь хашлагыг салгах боломжтой аж. Гэвч хайсыг орон сууцны хороолол дунд байрлуулсан нь иргэдийн шүүмжлэлийг дагуулах болжээ.

Тодруулбал, орон сууцны хорооллын дундах замын нэгдүгээр эгнээг хайсаар тусгаарласнаар иргэд автомашинаа түр хугацаагаар байрлуулах боломжгүй болсон гэж үзэж байна. Иргэдийн хэлж буйгаар, Улаанбаатар хотод авто зогсоолын хүрэлцээ муу, хамгийн гол нь хөрсөн дээрээ буугаагүй гэнэтийн шийдвэрийн хохирогч нь үргэлж иргэд байдагт бухимдалтай байгаа юм.

Өнгөрсөн 2023 онд гэхэд нэгдүгээр эгнээг автобус зорчих боломжтой болгож бусад эгнээнээс долоон км урттай хайсаар тусгаарлах ажил хийж байв. Гэвч удалгүй хайсыг хураасан байдаг. Шалтгаан нь хайс байрлуулснаар автомашины зорчих хэсэгт саад учруулж байгаа гэж үзжээ. Түүнчлэн иргэд тухайн хайсыг мөргөсөн осол ихээр бүртгэгдэх болсон юм.

Тухайн үед 950 сая төгрөгийн үнэтэй нийт 12700 метр урт хашлагаар замын нэгдүгээр эгнээг тусгаарлахаар зарлага гаргасан.

Үүнээс Яармагийн зам дээр 3000 метр орчмыг л тавьсан. Өртөг нь 200 орчим сая төгрөг болж, "Улаанбаатар зам засвар арчилгааны газар" хийж гүйцэтгэсэн билээ. Харамсалтай нь, бодит ажил хэрэг болж чадаагүй өндөр өртөгтэй хайсуудыг буцаан татан авсан юм.  Гэхдээ хураасан хашлагуудаа шаардлагатай бүсэд дахин ашиглахыг Улаанбаатар хотын ерөнхий менежер асан М.Баяраа онцолж байв.

Үүнээс дүгнэхэд дээрх хайснуудыг дахин ашиглаж, орон сууцны хороолол дунд байрлуулж байгаа бололтой. Энэ удаа дээрх ажил мөн л иргэдэд хүндрэл учруулж, оршин суугчид байрныхаа гадаа маргалдах болов. Бид хотоо төлөвлөхгүйгээр, хаана зайтай байна тэр газар нь очиж барилга барьсны үр дүнд түгжрэлээ дийлэхгүй, хүнд ээлгүй хот болсон. Улаанбаатар хотод нийт хүн амын 48.9 хувь буюу 1.7 сая хүн амьдарч, бүртгэлтэй аж ахуйн нэгжийн 70 хувь, худалдаа үйлчилгээний 84 хувь, их дээд сургуулийн 96 хувь, ДНБ-ий 63 хувь үйлдвэрлэгдэж байна. Энэ утгаараа иргэдийн амьдрах орчны чанарт сөргөөр нөлөөлж буйг нийслэлийн удирдлагууд хэлдэг. Гэвч үүний эсрэг хийж, хэрэгжүүлж байгаа ихэнх ажлууд нь иргэдэд дарамт учруулдаг. Анхнаасаа буруу төлөвлөсөн хотод иргэд амар тайван, аюулгүй амьдрахад асуудал гарч, нэг шийдвэрийн эсрэг талд нэг хэсэг иргэд хохирдог дүр зураг гаарч байна.

ХАЙС БАЙРЛУУЛАХ АЖИЛ ҮРГЭЛЖИЛНЭ 

Хамгийн сүүлд гэхэд нийслэлийн Баянгол дүүрэг замын эгнээ тусгаарлах хашаа, хайс байрлуулах ажлын тендер зарласан байна. Тус ажлын төсөвт өртөг 300 сая төгрөг бөгөөд 2500 метр урт хайс байрлуулахаар төлөвлөжээ. Үүнээс харахад цаашид ч янз бүрийн хайс, хашлага тойрсон асуудлууд үргэлжилж, иргэд хохирч, эрх баригчид эргэж буцсан шийдвэрээ хэрэгжүүлэх бололтой.

"ХОТОО ЦААШИД ЗӨВ ТӨЛӨВЛӨЛТӨД ОРУУЛАХ ХЭРЭГТЭЙ"

Хот төлөвлөлийн талаар УИХ-ын гишүүн, Хот байгуулалт, барилга, орон сууцжуулалтын сайд Ж.Батсуурь "Хот байгуулалт, барилга, орон сууцжуулалтын яам байгуулагдаад удаагүй байна. Бид бодлогоо нэгтгэхийн тулд НҮБ, ДЭМБ гээд олон улсын туршлагыг судлах хэрэгтэй. Монгол Улсыг хоёр хувааж харж болно. Улаанбаатар төвтэй нийт хүн амын 50 хувь, орон нутагт 21 аймаг түүний цаана байгаа сумууд 50 хувь болчхоод байна. 1992 он хүртэл Монгол Улсын иргэн хувьдаа өмчгүй байсан. Бүгд машингүй, орон сууцгүй байсан. Орон сууц барьсан ч машин цөөхөн учраас авто зогсоол барьдаггүй байсан. Тийм учраас нарийхан замууд тавьчихсан.

Гэтэл ардчилсан нийгэмд нэг өрх хэчнээн машинтай байгаа билээ. Энэ нөхцөл байдал хуучны төлөвлөлтөө даахгүй учраас ийм байдал үүсч байна.

Тийм учраас бид нар хотоо цаашид зөв төлөвлөлтөд оруулах хэрэгтэй. Үүний зэрэгцээ шинэ хотоо байгуулахаар ажиллаж байна. Шинэ Зуунмод хотыг анхнаас нь зөв төлөвлөж, алдаагүй байгуулах нэгдүгээр асуудал гэж үзэж байгаа. Мөн Улаанбаатар хотын алдааг богино хугацаанд засах хэрэгтэй байна. Түүнчлэн орон нутагт яг энэ алдааг давтаж байгаа 21 хот байна шүү дээ. Гаднаасаа харахад маш сайхан орон сууц байдаг, ороод амьдрахаар дөрвөн хана нь дулаан алдагдалтай олон асуудалтай байдаг. Тэгэхээр тэр байранд ороод амьдарсан цагаас өөрийнхөө олсон бүх орлогыг алдаж байдаг. Тэгэхээр энэ асуудлыг шийдэхийн тулд олон талт үйл ажиллагаа шаардлагатай байна" гэх байр суурийг илэрхийлсэн байдаг.