Хоол гэдэг заримдаа шинжлэх ухаан, урлагийн бүтээлийн холимог байдаг. Япончууд энэ жилийн Валентины баярт зориулж нэгэн сонирхолтой зүйл сэдсэн нь "Зүгээр л найзууд байцгаая" нэртэй шоколад юм. Шаржигнасан тэмпүраг шоколадаар шанзалсан энэхүү амттанг "Хар аянга Тэнпүра" гэж нэрлэнэ. Хэрвээ энэ шоколадыг Валентины баяраар хэн нэгэн өгвөл "Би чамайг зөвхөн найзын хувиар боддог" гэсэн утгатай болно.

"Юракү амттан" компани гоймонгийн сүлжээ ресторан "Ханамарү Үдон"-той хамтарснаар "Хар аянга Тэнпүра" бий болжээ.

"Ханамарү Үдон" ресторан нь энгийн үед сам хорхой, тахиа, мөөг, ногоотой тэнпүра гаргадаг ч гэлээ хоёрдугаар сарын 14-нийг хүртэл шоколадтай тэнпүраг тусгайлан цэсэндээ нэмжээ. "Бид хос болохгүй" гэсэн санааг агуулсан шоколадтай тэнпүра 100 иенээр борлуулагдана.

Дашрамд дурдахад, шоколадны үндсэн түүхий эд болох какаог баруун Африкт гол төлөв тарьж ургуулдаг. Гэвч бүс нутагт цаг агаарын таагүй байдал үргэлжилсэн, ажиллах хүчний асуудал нүүрлэсэн зэргээс болоод нийлүүлэлт буурчээ. Тухайлбал, 2024 онд Зааны ясан эргийн какаоны үйлдвэрлэл 2023 онтой харьцуулахад 22.4 хувиар буурсан байна. Криптовалютын дүн шинжилгээг харвал өнгөрсөн оны аравдугаар сарын 1-нээс хойш какаоны фьючерс хоёр дахин өссөн байна. Какаоны үнэ сүүлийн 50 жилд анх удаа ийм өндөр өсөлт үзүүлсэн нь энэ юм.

Нийлүүлэлт буурсан тул энэ жилийн Валентинаар шоколадны үнэ ч өсөх төлөвтэй байна.