АНУ-ын ерөнхийлөгч Дональд Трамп Ням гаригт өгсөн ярилцлагынхаа үеэр Канадыг 51 дэх муж болгох тухай ярьжээ. "Канадыг АНУ-д нэгтгэнэ гэсэн яриа үнэн үү" гэж "Fox News"-ийн сэтгүүлч түүнээс асуухад "Тийм ээ. Бид Канадад жил тутам 200 тэрбум ам.доллар алдаж байна. Тиймээс Канад манай 51 дэх муж болсон нь хамаагүй дээр. Ийм их алдагдлыг би хүлээн зөвшөөрөхгүй. Бид яагаад жил бүр 200 тэрбумын татаасыг Канадад төлөх ёстой гэж" гэжээ.

Зарчмын хувьд АНУ Канадад татаас өгдөггүй. Харин АНУ байгалийн баялаг ихтэй Канадаас газрын тос зэрэг түүхий эдээ худалдан авдаг. Дээрх тоо Америкийн эрчим хүчний импорт ямар хэмжээнд байгааг харуулна.

Канадыг 51 дэх муж болгон гэсэн санааг Трамп олон удаа хэлж буй. Мэдээж үүнд канадчууд таатай ханддаггүй. Канадын ерөнхий сайд Жастин Трюдо энэ талаар хэлэхдээ "Трамп үнэхээр ийм зүйл яриад байгаа. Энэ нь манай орны байгалийн баялагт хүрэх гэсэн түүний хүсэлтэй холбоотой. Үүнийг хийх хамгийн хялбар арга бол манай улсыг өөртөө уусгаж нэгтгэх. Канадад ямар нөөц байгааг тэд маш сайн мэднэ. Тэдгээрээс унагаж болох ашигт хамгийн их татагдаж байгаа" гэжээ.

Трамп Мексик, Канад улсуудад 20 хувийн татвар ногдуулсан ч сүүлд нь энэ шийдвэрээ түр 30 хоногийн хугацаанд цуцалсан. Үүнийгээ тэр эдийн засгийн хэлэлцээр хийх боломжит хугацаа гэж нэрлэсэн. Гэвч Канад, Мексикийн зүгээс хангалттай арга хэмжээ олж харахгүй байгаагаа Трамп хэлжээ.

Тэгвэл Трамп татварын бодлогоо өнөөдөр дахин чангаруулав. Тодруулбал, Канад, Мексик тэргүүтэй улсуудын ган, хөнгөн цагаанд 25 хувийн татвар ногдуулахаа тэр мэдэгдлээ. Мөн харилцан тариф тогтоох төлөвлөгөөг энэ долоо хоногийн сүүлээр зарлана гэжээ.