Улаанбаатарчууд өвлийн улиралд угаарын хийд хэдэн хүн хордсоныг тоолж, цаг уярахаар эргээд мартдаг болсон гэхэд хилсдэхгүй. Утаагүй түлшинд угаартсан гэх дуудлага нэмэгдэж байгаа нь олны сэтгэлийг эмзэглүүлж байна. Албаныхны зүгээс зуухаа шалгаж, яндангаа хөөлж, угаарын хий мэдрэгч байршуулахыг олон дахин сануулдаг. Хэн нэгэн эрүүл мэндээрээ хохирч, амь насаа алдлаа гэхэд "тэр хүний хохь" болж үлддэг. Нийслэлд 2017 оноос хойш нийт 779 хүн угаартаж нас барсан гэдэг тоог утааны сонсголын үеэр албаныхан мэдээлсэн. Гэтэл сүүлийн 10 гаруй хоногт 10 хүн харамсалтайгаар нас барлаа.

Хамгийн сүүлд цагдаагийн байгууллагад 2025 оны хоёрдугаар сарын 5-ны өдрийн 22.00 цагт “Ургах наран хорихоос хойш гал гараад байна” гэх дуудлага, мэдээлэл бүртгэгдсэн байна. Дуудлага мэдээллийн дагуу явуулсан шалгалтаар Баянзүрх дүүргийн 11 дүгээр хорооны нутаг … тоотод монгол гэр шатаж, дөрвөн иргэн нас барсан харамсалтай нөхцөл байдал тогтоогджээ. Галд 34 настай иргэнээс гадна гурван бага насны хүүхэд өртсөн байна.

Олон нийтийн сүлжээнд цагдаагийн алба хаагч угаартаж нас барсан гэдэг мэдээлэл цацагдсан ч албаныхан "Тухайн иргэн цагдаагийн байгууллагад ажиллаж байгаад 2024 оны наймдугаар сард албанаас чөлөөлөгдсөн" гэсэн юм.

Мөн нийслэлийн Баянгол дүүргийн 22 дугаар хороонд өнгөрсөн нэгдүгээр сарын 23-24-нийг шилжих шөнө гэр бүлийн зургаан хүн угаартсаны улмаас нас барсан байж болзошгүй харамсалтай хэрэг гарсан. Хэрэг явдал болсноос хойш 14 хоног өнгөрч байхад хохирогчийн хүү "Хэнд хандахаа ч мэдэхгүй байна. Хуульч өмгөөлөгч нар надад туслаач" гэж мэдээлэл хийсэн нь олны сэтгэлийг эмзэглүүлсэн.

2025 оны нэгдүгээр сарын 1-31-ний өдрийг хүртэлх тоон мэдээгээр 368 хүн угаарын хийн хордлогын улмаас эмнэлгийн тусламж, үйлчилгээ авсан байна. Тодруулбал, 322 хүн эмнэлгийн тусламж аваад буцсан, 32 хүн хэвтэн эмчлүүлээд гарсан, одоо хэвтэн эмчлүүлж байгаа зургаан хүн байна. Нэгдүгээр сарын 1-31-нийг хүртэлх хугацаанд долоон хүн нас харамсалтайгаар барсан гэх мэдээллийг утааны сонсголын үеэр ЭМЯ-ны төрийн нарын бичгийн дарга Д.Очирбат онцолсон юм.

Улаанбаатарт сайжруулсан шахмал түлш хэрэглэдэг 200 мянга орчим айл өрх бий. Эдгээр айл өрхийг угаартах эрсдэлээс сэргийлж 2020 онд угаарын хий мэдрэгч суурилуулсан. Энэ талаар нийслэлийн Засаг даргын орлогч А.Амартүвшин энэ сарын эхээр зохион байгуулсан утааны сонсгол дээр мэдээлэл өгөхдөө "Бид 2020 оноос 200 мянган айлд угаар мэдрэгч тараасан. Нэгдсэн хяналтын системтэй болж, угаарын дуудлагыг хянадаг болсон. Энэ системдээ 2023 онд 7800, 2024 онд 8666 угаар мэдрэгчийг нэмэлтээр холбосон.

Нийт 79.010 өрх ухаалаг системд холбогдсон.

Системийн өөрийнх нь ачааллаас хамаарч угаар мэдрэгчгүй, эрсдэлтэй айлууд байсаар байна. Бид 2025 онд 51 мянган ухаалаг угаар мэдрэгчийг авч, нэмэлтээр суурилуулна. Мөн газад холбогдож байгаа 52.389 айлд газны мэдрэгчийг байршуулна. Ингэснээр 182.399 өрхөд ухаалаг угаар мэдрэгч байршуулж, нэгдсэн хяналтаар хянаад явна. Ухаалаг төхөөрөмжийн нэгж бүр нь 150 мянган төгрөг. Мөн сүүлд гэр хорооллын айлуудад судалгаа хийхэд 50 гаруй мянган айлын зуухны битүүмж алдагдаж, угаартах эрсдэлтэй байна. Нийт 72884 айлд дулаалга зайлшгүй шаардлагатай гэж гарсан" гэдэг хариултыг өгч байв.