Израилийн цэргүүд гал зогсоох хэлэлцээрийн хүрээнд Газын зурвасын Нэтзарим коридороос ухарлаа. Нэтзарим коридор нь Газын зурвасын өмнөд, хойд хэсгийг тусгаарлаж байсан цэрэгтэй бүс юм. Цэргүүд ухрахтай зэрэгцээд зуу зуун палестин хүн орон гэртээ эргэн ирсээр байна. Палестинчууд орон гэртээ эргэн ирж буй нэртэй хэдий ч бүрэн сүйрлийн үзэгдэл тэднийг угтан авч байна.

Гал зогсоох хэлэлцээр нэгдүгээр сарын 19-нд эхэлсэн. Хэлэлцээрийн дагуу өнөөдрийг хүртэл барьцааны 16 израиль, 566 палестин хоригдол солилцоод байна. Гурван долоо хоногийн дараа хэлэлцээрийн эхний шат дуусахад нийт 33 израиль, 1900 палестин хүн суллагдах төлөвтэй байна.

Эргэн ирсэн палестинчууд хэвлэлд сэтгэгдлээ илэрхийлжээ. Тухайлбал, Нэтзаримын хойд хэсгийн аль-Маграгад оршин суудаг байсан Осама Абу Камил хэлэхдээ "Бид зүгээр л аймшгийн сүйрсэн дүр зураг олж харлаа. Израилийн эзлэн түрэмгийлэл бүх байшин, дэлгүүр, ферм, сүм хийд, их сургууль, шүүхийн байруудыг устгажээ. Манай гэр бүл нурсан байшингийнхаа дэргэд майхан бариад хэсэг амьдрана. Өөр сонголт үгүй" гэжээ. 57 настай тэрбээр Хан Юнист жил гаруй амьдарсан аж.

Дайн эхэлснээс хойш Газын хойд хэсгээс 700 мянга орчим хүн дүрвэсэн. Гэвч Израилийн цэргүүд Газын өмнөд хэсэг рүү ч шахсан тул тэд хэд хэдэн удаа нүүхээс өөр аргагүй болжээ.