Франц улсад нэгэн хүн галт тэрэгний буудал дээр гар утасныхаа чанга яригчийг ашиглаад, 200 ам.доллараар торгуулжээ. Түүнийг Дэвид гэх ба өнгөрсөн Ням гаригт Францын баруун хэсэгт орших Нантес өртөө дээр галт тэрэг хүлээж байхдаа утасныхаа чанга яригчийг ашигласан аж.

Тэр эгчтэйгээ яг ярьж байтал Францын төрийн өмчит галт тэрэгний "SNCF" компанийн хамгаалалтын ажилтан хүрч иржээ. Хамгаалалтын ажилтан түүнд "Чанга яригчаа унтраахгүй бол 150 еврогоор торгоно" гэж хэлсэн байна. Дэвид анхандаа хамгаалагчийг наргиж байна гэж боджээ. Гэвч тоглох нь бүү хэл, хамгаалалтын ажилтан дэвтрээ гаргаж ирээд түүнд торгууль ногдуулжээ. Яг торгох агшинд анхны хэлсэн 150 евро нь 200 болон нэмэгдсэн байна. Яагаад гэвэл Дэвид анхны шаардлагыг биелүүлээгүй.

Дэвид энэ хэргийн хойноос зарга үүсгэж, хуульч хөлслөх болжээ.

Орчин цагт олон нийтийн газарт чихэвчгүйгээр бичлэг үзэх, дуу сонсох зэрэг нь зохисгүй үйлдэл болсон. Ямар хүмүүсийг та нууцхан шүүдэг вэ гэж цахим сүлжээний хэрэглэгчдээс асуухад нэгэн хүн "Нам гүм орчинд ганцаараа чанга дуугаар ТикТок үзэж байгаа хүмүүс" гэж хариулсан байна. Энэ хариулт нь 13 мянган хүнд таалагдсан аж.

Британийн ёс зүйн библ гэх дүрэм 2023 онд зарим дүрмүүдээ шинэчлэн хэвлэсэн. Үүнд гар утасны хэрэглээг онцгойлон дурдсан байна. Дүрэмд зааснаар "Утасныхаа дуудлагыг хувьдаа л хадгал. Олон нийтийн газарт утсаар ярих бол, утсаа чихэндээ ойртуулж барихаас залхуураад байгаа бол зүгээр л чихэвч ашигла. Таны утасны яриаг хэн ч хүчээр чагнах ёсгүй. Энэ бол анхаарал сарниулсан, ичмээр үйлдэл. Галт тэрэг дүүрэн хүн яриаг нь сонсож байгааг мэдвэл цаад хүнд чинь ч гэсэн таатай санагдахгүй" гэжээ.