АНУ-ын цэргийн онгоц Энэтхэгийн 100 гаруй цагаачийг эх оронд нь хүргэж ирсэн талаар бид мэдээлсэн билээ. Тэд 40 цагийн турш нисч байж эх орондоо ирсэн юм. Гэвч энэ урт нислэгийн хугацаанд цагаачидтай гэмт хэрэгтэн адил зүй бус харьцсан нь асуудал дагуулаад байна.

Энэ хэргээс болоод Энэтхэгийн хууль тогтоогчид парламентын ордны гадаа жагсчээ. Цагаачдыг гавлаж, ариун цэврийн өрөө хүртэл оруулаагүй аж. Тиймээс жагсагчид гартаа гав зүүн ирж эсэргүүцлээ илэрхийлсэн байна. Шинэ Дели хотод Энэтхэгийн гол сөрөг хүчний намын залуучуудын жигүүрийн гишүүд Трампийн зургийг шатаажээ.

Нарендра Моди АНУ-ын 47 дахь ерөнхийлөгчийг Цагаан ордон дахь жинхэнэ найз минь гэж нэрийдсэн. Гэвч жагсагчид АНУ-ын ерөнхийлөгч Дональд Трамп, Энэтхэгийн ерөнхий сайд Нарендра Моди нарын нөхөрлөлийг шоолж байна. Одоо энэ асуудлыг шийдэхийн тулд тэр нөхөрлөлөө ашиглах хэрэгтэй гэж Пунжаб мужийн сайд С.Кулдип Сингх Даливал хэлжээ. Мөн "Тусламж хэрэгтэй байгаа энэтхэгчүүдэд тусалж чадахгүй юм бол энэ нөхөрлөл нь яг ямар ашиг тустай вэ" гэжээ.

Цагаачдын төлөөллийн хэлж буйгаар тэднийг гавлаж гинжилснээс гадна ариун цэврийн өрөө орох эрхийг нь хязгаарласан байна. Онгоц Гуам арал дээр түлшээ цэнэглэсэн бөгөөд энэ үеэр ч цагаачдын гав дөнгийг салгаагүй аж.

АНУ дахь бичиг баримтгүй цагаачдын багагүй хувийг энэтхэгчүүд бүрдүүлж байжээ. Тэд Латин Америкаар дамжин эрсдэл гарган байж АНУ-д очдог. Дэлхийн хамгийн олон хүн амтай улсад ажлын байрны хямрал нүүрлээд буй тул сүүлийн дөрвөн жилийн дотор АНУ-д хууль бусаар нэвтэрсэн энэтхэг цагаачийн тоо огцом өсчээ. Тодруулбал, 2018-2019 оны санхүүгийн жилд 8027, 2022-2023 оны санхүүгийн илд 96917 цагаач АНУ-д хууль бусаар нэвтэрсэн байна.

АНУ цагаачдыг албадан гаргахдаа зүй бус харьцсан тохиолдол ганц үүгээр дуусахгүй. Өнгөрсөн сард Колумбын цагаачдыг албадан гаргахдаа ч гав дөнгө зүүсэн байсан нь хоёр улсын хооронд ширүүн маргаан үүсгэж, Колумбын ерөнхийлөгч Густаво Петр цэргийн нисэх онгоцыг газардах зөвшөөрөл өгөхөөс татгалзаж байжээ.