““Түүхэнд мөнхөрсөн хошой баатар, Маршал Х.Чойбалсан-130” тусгай үзэсгэлэнг байгуулж олон нийтэд нээлттэй толилуулж байна. Энэхүү үзэсгэлэнгийн нээлтийн ёслол өнөөдөр  11.40 цагаас Монгол цэргийн музейн үзэсгэлэнгийн танхимд болно.

Монгол цэргийн түүхэнд "Өрлөг жанжин" буюу "Маршал" хэмээх цэргийн дээд цол хүртсэн гурван хүний нэг нь Хорлоогийн Чойбалсан билээ.

Түүний цэрэг, улс төрийн идэвхтэй үйл ажиллагаа 1920-д оны сүүлчээс эхэлж, журамт цэргийн суртал номлогчоос ЦЯЯ-ны сайд бөгөөд Бүх цэргийн жанжин хүртэл дэвшин ажиллаж, Монгол Улсынхаа тусгаар тогтнолыг дэлхий дахинд хүлээн зөвшөөрүүлж, эрх чөлөө тусгаар тогтнолыг бидэнд үлдээсэн нь юугаар ч үнэлж баршгүй гавьяа билээ.

Монголын Үндэсний музей, Монгол цэргийн музейн сан хөмрөгөөс БНМАУ-ын хошой баатар, маршал Х.Чойбалсангийн эдлэж хэрэглэж байсан Маршалын иж бүрэн дүрэмт хувцас, шинель, папах малгай, савхин дээл, нөмрөг, шатар, бичгийн хэрэглэл, ширээний хонх, энгэрийн цаг, дуран, зөвлөгөөний ширээ, БНМАУ-ын баатрын үнэмлэх, буу, сэлэм зэрэг 130 биет үзмэр, 40 гаруй гэрэл зураг, нэрт уран бүтээлчдийн 10 гаруй  уран зураг, Батлан хамгаалахын төв архиваас 20 орчим архивын ховор баримт зэрэг нийт 200 орчим биет үзмэр, баримт материалыг дэглэн үзэгч олны хүртээл болгож байна.

Үзэсгэлэн 2025 оны хоёрдугаар сарын 8-ны өдрөөс гуравдугаар сарын 25-ныг хүртэл олон нйитэд нээлттэй ажиллах юм байна.

1921 оны Үндэсний ардчилсан хувьсгалын тэргүүлэх удирдагчдын нэг, Ардын нам, төр, цэргийн нэрт зүтгэлтэн, БНМАУ-ын хошой баатар, өрлөг жанжин Хорлоогийн Чойбалсангийн мэндэлсний 130 жилийн ойд зориулсан энэ үзэсгэлэнг Батлан хамгаалах яам, Соёл, спорт, аялал жуулчлал, залуучуудын яам, Монголын Үндэсний музей, Монгол цэргийн музей, Дорнод аймгийн музейтэй хамтран зохион байгуулж байна.