Израилийн ерөнхий сайд Беньямин Нетаньяху АНУ-ын ерөнхийлөгч Дональд Трампийн Газын зурвасыг “эзлэн авах” маргаантай саналыг дэмжиж байгаагаа илэрхийлэв. Трампийн саналд Газын иргэдийг өөр Ойрхи Дорнодын бүс нутаг руу шилжүүлж, оронд нь Израиль болон АНУ бүс нутгийг удаан хугацаанд хяналтдаа авахыг тусгажээ.

Тухайлбал 10-15 жилийн турш Газын зурваст сэргээн босгох ажиллагаа явуулах хүсэлтэй байгаагаа Трамп мэдэгдсэн юм.

Үүнийг бусад улс орны хууль тогтоогч, хүний эрхийн бүлэг төдийгүй палестинчууд эсэргүүцэж буй. Нетаньяху уг саналыг"гайхалтай санаа" гэж тодорхойлж, бүх хүнд илүү сайхан ирээдүйг бий болгоно гэж үзжээ. Эсэргүүцэгчдийн хувьд энэ нь олон улсын хуулийг зөрчиж, үндэс угсааг устахад хүргэж болзошгүй гэж үзэж байна. Мөн зарим палестинчууд эх орноо орхиж явахгүй гэдгээ илэрхийлсэн юм. Гэсэн хэдий ч Нетаньяху Газын зурваст байх палестинчуудыг нүүлгэх ажиллагааг Израиль гүйцэтгэх сонирхолтой байгаагаа мэдэгдэв.

Үүнээс гадна Израилийн батлан ​​хамгаалахын сайд Исраэль Кац палестинчуудыг сайн дураараа нүүхэд туслах төлөвлөгөө бэлтгэх ажлыг эхлүүлсэн байна.

Уг төлөвлөгөөнд палестинчуудыг Испани, Ирланд, Норвеги зэрэг янз бүрийн улс орнууд руу илгээж, Газын зурвасыг цэрэггүй бүс болгох тухай байх бололтой. Ерөнхийдөө, Трампийн тавьсан санал нь олон жилийн турш Израиль, Палесины асуудалд оролцож байсан АНУ эрс өөрчлөгдсөн гэдгийг харуулж байна. Өмнө нь АНУ зэр зэвсэг, цэргийн хүчний тусламжийг Израильд илгээдэг байсан бол одоо анх удаа холбооны армийг Газад байршуулах санал гаргалаа. Гэсэн хэдий ч санал хэрэгжиж эхлэхээр бол хүний эрхийг зөрчсөн томоохон асуудал үүснэ гэж ажиглагчид үзэж байна.